रुपन्देही–३ को उपनिर्वाचन रद्द

• संवैधानिक प्रावधानले उपनिर्वाचन बाधक बनेकाले सबै तयारी स्वतः स्थगित भएको आयोगको जानकारी

बुटवल | रुपन्देही ३ मा कार्तिक १७ गते तय गरिएको उपनिर्वाचन रद्द भएको छ । निर्वाचन आयोगका अनुसार प्रतिनिधिसभा विघटन भइसकेको र नयाँ निर्वाचन मिति घोषणा भइसकेको अवस्थामा संवैधानिक व्यवस्थाअनुसार उपनिर्वाचन आवश्यक नदेखिएको हो ।

२०७९ मा रूपन्देही–३ बाट निर्वाचित राप्रपा सांसद दीपक बोहोराको निधनपछि रिक्त भएको पद पूर्ति गर्न आयोगले तयारी थालेको थियो। राजनीतिक दलहरूले पनि उम्मेदवार घोषणा र गठबन्धनबारे अन्तिम तयारी गरिसकेका थिए ।

निर्वाचन आयोगले मतदाता नामावली अद्यावधिक गर्ने, कर्मचारी परिचालन गर्ने र अन्य प्राविधिक तयारी अघि बढाएको थियो । तर प्रतिनिधिसभाको कार्यकाल समाप्ति नजिक हुनु र बाँकी कार्यकाल दुई वर्षभन्दा कम हुनुका कारण संविधानको धारा ८४ (६) अन्तर्गत अब उपनिर्वाचन नगर्ने निर्णय गरिएको हो ।

आयोगका अधिकारीहरूले भने, “संवैधानिक प्रावधानले बाधक बनेकोले सबै तयारी स्वतः स्थगित भएको हो।” यस निर्णयसँगै जिल्लामा चलिरहेको राजनीतिक चहलपहल पनि रोकिएको छ ।