पोखरामा कोरोना संक्रमित बिरामीको निधन

 पोखरामा असार २५ गते कोरोना संक्रमण पुष्टि भएकी एक महिलाको निधन भएको छ । तर, कोरोनाकै कारण उनको निधन भएको पुष्टि भइसकेको छैन । मृतक महिला अन्य रोगबाट समेत ग्रस्त थिइन् ।

चरक अस्पतालमा उपचाररत ७४ वर्षीय ती महिलामा उच्च रक्तचाप र मधुमेह पनि थियो । प्रादेशिक स्वास्थ्य निर्देशनालय गण्डकीका निर्देशक खिमबहादुर खड्काले मृतक महिलामा कोरोना संक्रमण देखिएको बताए ।

“नमुना जाँच हामीले गरिराखेका छौँ, उहाँमा (मृतक) असार २५ गते संक्रमण देखिएको थियो । हिजो निधन भयो भन्ने जानकारी आएको छ,” उनले भने ।

मृत्युको कारण चाहिँ कोरोना नै हो भन्ने पुष्टि नभएको उनले बताए । “कोरोना पुष्टि भएकै हो । तर, कोरोनाकै कारण निधन भएको भन्ने प्रमाण चाहिँ अहिलेसम्म छैन,” उनले भने ।

खड्काका अनुसार, नमुना जाँच निरन्तर चलिरहेको छ ।

निर्देशनालयका अनुसार, हाल प्रदेशभर आठजना संक्रमित उपचाररत छन् । तीमध्ये कास्कीमा पाँचजना छन् । बागलुङमा दुई र स्याङ्जामा एकजना छन् ।