राष्ट्रपति रनिङ शिल्डमा लुम्बिनीका लागि कपिलवस्तुका राहुलकाे नयाँ रेकर्डसहित स्वर्ण पदक

कपिलवस्तु । त्रिपुरेश्वरस्थित दशरथ रंगशालामा जारी १५ औं केन्द्रीय राष्ट्रपति रनिङ शिल्ड प्रतियोगितामा आजको दिन लुम्बिनी प्रदेशका लागि गौरवपूर्ण रह्यो। कपिलवस्तुकाे शिवराज नगरपालिकाका राहुल थारुले पुरुष ज्याभलिन थ्रो इभेन्टमा ५७.४० मिटर लामो थ्रो गर्दै प्रतियोगिताको नयाँ रेकर्ड कायम गर्दै स्वर्ण पदक जित्न सफल भएका छन्।

यसअघि धिरेन्द्र जङ्ग शाहले कायम गरेको ५५.५० मिटरको रेकर्ड तोड्दै राहुलले नयाँ इतिहास रचेका हुन्। यससँगै उनले आफैंले बनाएको प्रदेशस्तरीय ५२.६० मिटरको कीर्तिमान समेत सुधार गरेका छन्।

युवा तथा खेलकुद मन्त्रालयको सहयोगमा राष्ट्रिय खेलकुद परिषद् (राखेप) द्वारा आयोजना गरिएको यस राष्ट्रिय स्तरको प्रतियोगितामा राहुलको प्रदर्शनले लुम्बिनी प्रदेशको खेलकुदको गौरव अझै उचो बनाएको छ।