देशभरका प्रतिस्पर्धीलाई पछि पार्दै बाणगंगा ९ का अजय पाण्डेको “स्वर्ण जित”

राजेन्द्र खनाल, कपिलवस्तु । कपिलवस्तुको बाणगंगा नगरपालिका–९ का युवा म्याराथन धावक अजय पाण्डेले हालै काठमाडौंमा सम्पन्न “वन रन कम्पिटिसन” मा ५ किलोमिटर दौडतर्फ स्वर्ण पदक जितेका छन्। लुम्बिनी प्रदेशको प्रतिनिधित्व गर्दै प्रतियोगितामा सहभागी भएका पाण्डेले देशभरबाट तीन सयभन्दा बढी प्रतिस्पर्धीलाई पछि पार्दै यो उपलब्धि हासिल गरेका हुन्।

प्रतियोगिता ‘विश्व एकताका लागि खेलकुद’ भन्ने नारासहित आयोजना गरिएको थियो, जसमा विभिन्न विधाका म्याराथन धावकहरूको सहभागिता रहेको थियो। अजय पाण्डेले यसअघि पनि थुप्रै राष्ट्रिय तथा क्षेत्रीय प्रतियोगिताहरूमा उत्कृष्ट प्रदर्शन गर्दै विभिन्न पदकहरू हात पारेका छन्।

उनले साझाकुरा सँग भने, “यो सफलताले मलाई अझ आत्मविश्वासी बनाएको छ र मेरो खेल जीवनलाई अझ मजबुत बनाएको महसुस गरेको छु।”

खेलकुदको माध्यमबाट राष्ट्रिय तथा अन्तर्राष्ट्रिय स्तरमा नाम चम्काउने सपना बोकेका पाण्डे जस्ता धावकहरूका लागि यस्तो सफलता प्रेरणाको स्रोत बन्ने निश्चित छ। स्थानिय स्तरबाट हुर्किएको प्रतिभाले राष्ट्रिय स्तरमा हात पार्ने सफलता कपिलवस्तु, लुम्बिनी मात्र नभई सम्पूर्ण देशकै लागि गर्वको विषय बनेको छ।