देशभर १० लाखभन्दा बढी किशोरीले लगाए एचपीभी खोप

साझाकुरा | कपिलवस्तुसहित देशभर अहिले एचपीभी खोप कार्यक्रम संचालनमा छ । यो अभियान चलिरहेका बेला मंगलबारसम्म देशभर १० लाखभन्दा बढीले यो खोप लगाएका छन् । सरकारले माघ २२ गतेदेखि देशभर एचपीभी खोप अभियान सुरु गरेको थियो ।

अभियानमार्फत ६० प्रतिशत किशोरीले खोप लगाएको स्वास्थ्य सेवा विभाग अन्तर्गतका बाल स्वास्थ्य तथा खोप शाखाले जनाएको छ । अभियान फागुन ६ गतेसम्म जारी रहने छ । देशभरका विद्यालयका कक्षा ६ देखि १० सम्मका र विद्यालय बाहिर रहेका १० देखि १४ वर्ष उमेर समूहका १६ लाख ८ हजार ७६ किशोरीलाई खोप लगाउने सरकारको लक्ष्य छ ।

एचपीभी खोप भनेको पाठेघरको मुखको क्यान्सरविरुद्ध लगाउने खोप हो । यो क्यान्सर नेपाली महिलामा सबैभन्दा धेरै देखिएको छ । सबैभन्दा बढी मृत्युको कारक पनि यही क्यान्सर हो ।

औसतमा दैनिक ६ जनामा यो क्यान्सर पत्ता लाग्ने गरेको छ । यसमध्ये ४ जनाको मृत्यु हुने गरेको छ । यो अवस्थालाई निवारण गर्न खोप अपरिहार्य रहेकाले सरकारले एचपीभी खोप अभियान अघि सारेका हो ।

कपिवस्तुको बाणगंगामा मंलबारदेखि यो खोप कार्यक्रम संचालनमा आएको छ । यहाँका आधारभूत र माध्यमिक तहका विद्यालयहरुलाई खोप केन्द्रको रुपमा स्थापना गरी विद्यालयमा अध्ययनरत किशोरीहरुलाई खोप दिइएको जनाइएको छ ।