लुम्बिनीको मायादेवी मन्दिरको दानपेटीबाट १ करोड ४३ लाख संकलन

बुटवल : बुद्धजन्मस्थल लुम्बिनीस्थित मायादेवी मन्दिरको दानपेटीबाट यसपटक १ करोड ४३ लाख ५९ हजार ९ सय ९० रूपैयाँ संकलन भएको छ। यो रकम आर्थिक वर्ष २०८१/०८२ अन्तर्गत दोस्रोपटक गरिएको दानपेटी गणनाबाट प्राप्त भएको लुम्बिनी विकास कोषले जनाएको छ।

पुस १८ गतेदेखि २३ गतेसम्म, पाँच दिन लगाएर दानपेटीको गणना गरिएको थियो। लुम्बिनी विकास कोषका कोषाध्यक्ष ढुण्डिराज भट्टराई (सिद्धिचरण) का अनुसार दानपेटी खोल्न र रकम गणना गर्न स्थानीय तहका प्रतिनिधि, सुरक्षाकर्मी, प्रहरी, र अन्य सरोकारवालाहरूको उपस्थितिमा प्रक्रिया सम्पन्न गरिएको हो।

दानपेटीमा संकलित रकमलाई सिसिटिभी क्यामेराको निगरानीमा ३२ जना कर्मचारीहरूले गणना गरेका थिए। मन्दिरमा आउने श्रद्धालु र तीर्थयात्रीहरूले चढाएको दानबाट संकलित यो रकम कोषको आन्तरिक खर्च व्यवस्थापनमा प्रयोग हुँदै आएको छ।

मायादेवी मन्दिरमा आउने तीर्थयात्रीहरूले श्रद्धा र आस्थाका साथ चढाउने दान मन्दिरको सञ्चालन र व्यवस्थापनका लागि महत्त्वपूर्ण स्रोत बन्दै आएको छ। लुम्बिनी विकास कोषले यो रकमलाई पारदर्शी ढंगले प्रयोग गर्ने प्रतिबद्धता व्यक्त गरेको छ।