सैनामैनामा सवारी दुर्घटना हुदाँ एकको मृत्यु

बुटवल : रुपन्देहीको सैनौनामा सडक दुर्घटना हुँदा एक जनाको मृत्यु भएको छ भने १ जना घाइते भएका छन्। मृत्यु हुनेमा सैनामैना नगरपालिका–६ की ३५ वर्षीया लक्ष्मि भट्टराई रहेको इलाका प्रहरी कार्यालय बुटवल प्रमुख  विजयराज पण्डितले जानकारी दिए ।

शनिवार साँझ बुटवलबाट कपिलबस्तु तर्फ जाँदै गरेको लु ९१ प ११८४ नम्बरको मोटरसाइकलले उत्तरबाट दक्षिणतर्फ जाँदै गरेको लु ३० प ३५११ नम्बरको स्कुटरलाई ठक्कर दिएको थियो ।

दुर्घटनामा परी गम्भीर घाइते भएकी स्कुटरकी चालक भट्टराईको उपचारको क्रममा मृत्यु भएको प्रहरी प्रमुख पण्डितले बताए । यस्तै दुर्घटनामा परी मोटरसाइकलका चालक कपिलबस्तुको बुद्धभूमि नगरपालिका ३ का २१ वर्षीय दिलिप थारु घाइते भएका छन् ।

थारुको अहिले भैरहवा स्थित युसिएमसिमा उपचार भइरहेको छ । लुम्बिनी प्रादेशिक अस्पतालमा उपचार हुन नसकेपछि थप उपचारका लागि उनलाई युसिएमसीमा रिफर गरिएको हो । उनको अवस्था मध्यम रहेको छ ।