‘प्रचण्ड’ नेतृत्वको सरकार कामचलाउ ताेकियाे, कहिले बन्छ नयाँ सरकार ?

राष्ट्रपति रामचन्द्र पौडेलले नयाँ सरकार नबन्दासम्म पुष्पकमल दाहाल ‘प्रचण्ड’ नेतृत्वको सरकारलाई कामचलाउ तोकेका छन् ।

राष्ट्रपति कार्यालयले शुक्रबार साँझ एक विज्ञप्ति प्रकाशित गरी प्रचण्डको मन्त्रिपरिषद्लाई कामचलाउ तोकेको हो ।

नयाँ सरकार गठन नहुँदासम्म पदमुक्त भएकै सरकार कामचलाउ हुने संवैधानिक व्यवस्था छ । सोही अनुसार प्रचण्ड मन्त्रिपरिषद्लाई कामचलाउ तोकिएको शीतलनिवास स्रोतले बतायो ।

प्रतिनिधि सभामा विश्वासको मत नपाएर पदमुक्त भएका प्रधानमन्त्री प्रचण्डले शुक्रवार नै राष्ट्रपतिसँग बिदाइ भेट गरेका छन् । प्रचण्ड शीतल निवासबाट सिधै खुमलटार गएका छन् ।

यसैबीच राष्ट्रपति पौडेलले नयाँ सरकार गठनका लागि संविधानविद्हरूको राय लिएका छन् ।

शुक्रबार साँझ भएको छलफलमा संविधानविद्हरूले उनलाई संविधानको धारा ७६ (२) अनुसार नै सरकार गठन गर्न सुझाव दिएका थिए ।