चित्तलको सुकुटीसहित तीन जना पक्राउ

दाङ । प्रहरीले दाङमा १७ किलो चित्तलको सुकुटीसहित तीन जनालाई आइतबार राति पक्राउ गरेको छ । पक्राउ पर्नेमा लमही नगरपालिका–६ का ४५ वर्षीय नुरबहादुर कुमाल, गढवा गाउँपालिका–६ का ३० वर्षीय मनोज थापा मगर र ३१ वर्षीय करण केसी रहेका छन् ।

लमहीदेखि घोराहीतर्फ जाँदै गरेको रा २ प ६१९५ नम्बरको मोटरसाइकल र बा ९१ प ११०७ नम्बरको मोटरसाइकल घोराही उपमहानगरपालिका–३ कुईरेपानीमा जाँच गर्दा बा ९१ प ११०७ नम्बरको मोटरसाइकल पछाडि सवार करण केसीले प्लास्टिकको जेब्रा झोलामा चितलको सुकुटी बोकेको भेटिएपछि सुकुटीसहित उनीहरुलाई पक्राउ गरेको जिल्ला प्रहरी प्रवक्ता डिएसपी राजनकुमार गौतमले बताए ।

उनीहरुलाई आवश्यक कारबाहीका लागि डिभिजन वन कार्यालय घोराहीमा बुझाइएको गौतमले जानकारी दिए ।