अमृते सामुदायिक वनको अध्यक्षमा पौडेल निर्वाचित

कपिलवस्तु । कपिलवस्तुको बाणगंगा नगरपालिका वडा नम्बर ९ भर्तापुर स्थित अमृते सामुदायिक वनको अधिवेशन अन्र्तगत आज भएको निर्वाचनमा भारी मतान्तर सहित योगेन्द्र पौडेल निर्वाचित हुनुभएको छ ।

शुक्रबार अध्यक्ष पदका लागि मात्रै भएको निर्वाचनमा गोपाल गिरी र योगेन्द्र पौडेल चुनावी मैदानमा रहनुभएको थियो । सम्पन्न निर्वाचनमा गोपाल गरीले ५४ मत ल्याउँदा योगेन्द्र पौडेलले २१९ मत सहित विजयी हुनुभएको निर्वाचन मण्डलका सदस्य बाबुराम रायमाझीले जानकारी दिनुभएको छ ।

गिरी र पौडेल बिचको मतान्तर १६५ रहेको छ । कुल खसेको मतमा एक मत बदर भएको निर्वाचन मण्डलले जानकारी दिएको छ ।

अमृते सामुदायिक वन कार्यसमितिको केही साता अघि सम्पन्न साधारण सभा तथा अधिवेशनले नयाँ कार्यसमिति चयनका लागि अन्य सबै पदमा सहमतिमा टुङ्गो लगाएको भए पनि मुख्य नेतृत्वदायी पदमा कुरा नमिले पछि निर्वाचन भएको हो ।वन उपभोक्ता समुहका सदस्यहरुले आज अध्यक्ष चयनका लागि मतदान गरेका थिए । गिरी यस अघिको कार्यकालमा वनको नेतृत्व गरेका व्यक्ति हुन भने पौडेल यस अघिको कार्यकालमा कार्यसमिति सदस्यमा रहेर काम गरेका थिए ।

दुर्गा पौडेलको संयोजकत्वमा हरिराज घिमिरे, नायारण खनाल र बाबुराम रायमाझी सदस्य रहेको निर्वाचन मण्डलले आज वनको नेतृत्व चयनका लागि चुनाव गराएको हो ।