२० वर्षमुनिकाे महिला साफ च्याम्पियनशिपमा नेपालले भुटानलाई ४ गोलले हरायो

काठमाण्डाै

बङ्गलादेशमा भइरहेको २० वर्षमुनिकाे महिला साफ च्याम्पियनशिप फुटबलमा नेपालले भुटानलाई चार–शून्य गोलले हराएको छ ।

ढाकामा आज आइतवार भएको खेलमा भुटानलाई चार–शून्य गोल अन्तरले हराउँदै नेपालले प्रतियाेगितामा पहिलाे जित निकालेको हो । नेपालको जितमा अमिषा कार्कीले ह्याट्रिक गरिन् भने कप्तान प्रिती राईले एक गोल गरिन् ।

नेपाल पहिलो खेलमा बङ्गलादेशसँग तीन–एक गोलले पराजित भएको थियो भने भुटानलाई भारतले १२ गोलले हराएको थियो । प्रतियोगितामा नेपालसहित आयोजक बङ्गलादेश, भारत र भुटानको सहभागिता रहेको छ ।

राउन्ड रोबिनको आधारमा हुने प्रतियोगिताको शीर्ष दुई टोलीले उपाधिका लागि आउँदाे बिहीवार खेल्नेछन् ।

तस्बिर : एन्फा