भारतद्वारा श्रीलंकाविरुद्धको टी-२० सिरिज कब्जा, सूर्यकुमारले बनाए अविजित ११२ रन

काठमाडौं

भारतले श्रीलंकाविरुद्धको तीन म्याचको टी-२० सिरिज कब्जा गरेको छ । राजकोटमा खेलिएको तेस्रो म्याचमा श्रीलंकालाई ९१ रनले हराएर भारतले सिरिज कब्जा गरेको हो ।

भारतको जितमा सूर्यकुमार यादवले अविजित ११२ रन योगदान गरे । पहिले ब्याटिङ गरेको भारतले पाँच विकेटको क्षतिमा २२८ रन बनाएको थियो । जवाफमा श्रीलंका १७ ओभरमा १३७ रनमा अलआउट भयो ।

श्रीलंकाका लागि कप्तान दशुन शनाका र कुसल मेन्डिसले समान २३/२३ रन बनाए । धनन्जय डे सिल्भाले २२ र पथुम निसान्काले १५ रन बनाए । अन्यले दोहोरो अंकको रन जोड्न सकेनन् ।

बलिङतर्फ पनि भारतको प्रदर्शन राम्रो रह्यो । अघिल्लो म्याचमा महँगो सावित भएका अर्शदीप सिंहले तेस्रो म्याचमा २० रन मात्र खर्चिएर ३ विकेट लिए । हार्दिक पाण्ड्या, उमरान मलिक र युजवेन्द्र चहलले २–२ विकेट लिए ।

यो जितमा सूर्यकुमार हिरो सावित भए । ५१ बल सामना गरेका उनले ९ छक्का र सात चौकाको मद्दतमा ११२ रन बनाए । टी–ट्वान्टी क्रिकेटमा उनको यो तेस्रो शतक हो । भारतका लागि शुभमन गिलले ४६ र राहुल त्रिपाठीले ३५ रन बनाए । बलिङतर्फ श्रीलंकाका दिलशान मदुशांकाले २ विकेट लिए ।

यो जितसँगै भारतले तीन म्याचको सिरिज २–१ले कब्जा गर्यो । भारतले पहिलो म्याच २ रनले जितेको थियो । दोस्रो म्याच श्रीलंकाले १६ रनले जितेको थियो ।

भारत र श्रीलंकाबीच १० जनवरीदेखि तीन म्याचको वनडे सिरिज हुनेछ ।

100

प्रतिक्रिया

खबर सबै

छोराको हत्याको खबर सुनेपछि दाङमा आमाको पनि मृत्यु

लुम्बिनी प्रदेश सबै

लुम्बिनीमा सवारी दुर्घटनाको मुख्य कारण तीव्र गति, साउनमा ३५ जनाको मृत्यु

साझा अपडेट

MENU