दाङ : कोरोनाको जोखिम बढेपछि कोइलाबास नाकामा हेल्थडेस्क स्थापना

दाङ

कोरोनाको नयाँ भेरियन्टबाट संक्रमणको जोखिम बढ्दै गएपछि दाङको गढवा गाउँपालिकाले भारतसँगको सीमा नाका कोइलाबासमा कोरोना चेकजाँच हेल्थडेस्क स्थापना गरेको छ । मंगलबार गढवा गाउँपालिका अध्यक्ष यमनारायण शर्मा पोख्रेलले हेल्थडेस्क स्थापना गरेका हुन् ।

भारतबाट नेपाल भित्रिनेहरुमा कोरोनाका सम्भावित लक्षण छन् कि छैनन् भनेर परीक्षण गर्न हेल्थ डेस्क सञ्चालनमा ल्याइएको अध्यक्ष पोख्रेलले जानकारी दिए । उनका अनुसार हाल सीमा नाकाबाट आउ–जाउ गर्नेहरुलाई मास्क लगाउन अनिवार्य गरिएको छ ।

हेल्थ डेस्क स्थापना कार्यक्रममा बोल्दै अध्यक्ष पोख्रेलले कोरोनाको नयाँ भेरियन्टबाट बच्न आ–आफ्नो स्थानबाट सावधानी अपनाउन अनुरोध गरे । स्वास्थ्यमा लापरबाही नगर्न र भारतीय सुरक्षाकर्मीहरुसँग पनि सहकार्य गरेर सीमा नाकामा कडाइ गर्न उनले सुरक्षाकर्मीहरुलाई पनि आग्रह गरे ।

गढवा गाउँपालिकाका स्वास्थ्य शाखा प्रमुख कैलाश चौधरीका अनुसार तत्कालका लागि हेल्थ डेस्कमा कोइलाबास स्वास्थ्य चौकीबाट एकजना स्वास्थ्यकर्मीलाई खटाइएको छ । यात्रुहरुको चाप बढेमा थप जनशक्ति परिचालन गरिने उनले बताए ।

लुम्बिनी प्रदेशको राजधानी दाङको राप्ती उपत्यकाबाट भारतसँग जोडिएको सबैभन्दा नजिकको नाका कोइलाबास हो । लमही बजारबाट कोइलाबाससम्मको दुरी जम्मा साढे ३३ किलोमिटर छ जबकी कपिलवस्तुको कृष्णनगर पुग्न ८० किलोमिटर र बाँकेको नेपालगञ्ज पुग्न १२५ किलोमिटर दुरी पार गर्नुपर्छ ।

भारतको तुलसीपुरसँग जोडिएको दाङको कोइलाबास विगतमा दाङ र त्यस आसपासका जिल्लाका लागि मुख्य व्यापारिक नाका थियो । मानिसहरु गढवा हुँदै घोडा, राँगामा सामान ओसारपसार गर्दथे । तर पूर्व–पश्चिम राजमार्ग बनेपछि कोइलाबास नाका सुकेको थियो । हाल लुम्बिनी प्रदेश सरकार र गढवा गाउँपालिकाले कोइलाबास नाकामा पुनस् चहलपहल ल्याउने प्रयास गर्दै आएका छन् ।