कोभिड–१९ बाट सुरक्षित रहन नभुल्नुस् जनस्वास्थ्यका यी मापदण्ड

काठमाडौं

सरकारले कोभिड–१९ संक्रमणबाट आफू जोगिन र अरुलाई पनि जोगाउन आग्रह गरेको छ । संक्रमण निरन्तर बढ्दै गइरहेको भन्दै यसबाट जोगिन चिया पसल तथा चौतारीमा भिडभाड नगर्न स्वास्थ्य चता जनसंख्या मन्त्रालयले आग्रह गरेको छ ।

कार्यालय तथा सार्वजनिक स्थलमा अनावश्यक भिडभाड नगर्न आग्रह गर्दै आएको मन्त्रालयले पालो आएपछि खोप लगाउन भनेको छ । स्वास्थ्य सुरक्षाका नियमित मापदण्ड पालना गर्न नभुल्न पनि मन्त्रालयले आग्रह गरेको छ ।

माघ महिनाका ११ दिनमा मात्रै १ लाख २५ जना संक्रमित थपिएका छन् । योसँगै नेपालमा कोभिड १९ संक्रमित हुनेको जम्मा संख्या १० लाख ४५ हजार ६३४ पुगेको छ भने सक्रिय संक्रमितको संख्या अहिले ८८ हजार ९३४ छ ।

यीमध्ये ५६ हजार ८८२ सक्रिय संक्रमित काठमाडौं उपत्यकामा रहेका छन् ।

काठमाडौं उपत्यकाका तीन जिल्लासहित झापा, मोरङ, सुनसरी, धनुषा,चितवन, मकवानपुर, काभ्रे, कास्की, नवलपरासी, रूपन्देही, बाँके र कैलाली रेड जोनमा छन् ।

यी जिल्लामा ६ सयदेखि ९ हजार जनासम्म सक्रिय संक्रमित रहेका छन् ।