भारतको उत्तर प्रदेशमा ८९ जनामा जिका भाइरसको सङ्क्रमण देखियो

काठमाण्डाै

भारतमा जिका भाइरसको सङ्क्रमण देखिएको छ । उत्तर प्रदेशको सबैभन्दा धेरै जनसङ्ख्या भएको जिल्लामा १७ जना बालबालिकासहित कम्तीमा ८९ जनामा जिका भाइरसको सङ्क्रमण देखिएको स्वास्थ्य अधिकारीलाई उद्धृत गर्दै बीबीसीले जनाएको छ ।

कानपुरका प्रमुख मेडिकल अधिकृत डाक्टर नेपाल सिंहले पछिल्ला दिनमा सङ्क्रमण बढ्दो क्रममा रहेको बताएका खबरमा उल्लेख छ । भारतमा पहिलो पटक सन् २०१७ मा गुजरातमा जिका भाइरसको सङ्क्रमण देखिएको थियो ।

अहिले कानपुरपछि उत्तर प्रदेशमा सङ्क्रमण देखिनु डरलाग्दो विषय भएको भन्दै स्वास्थ्य अधिकारीहरूले प्रकोपको निगरानी गर्न र फैलावट रोक्न टोली गठन गरेको बताएका छन् । उत्तर प्रदेशका मुख्यमन्त्री योगी आदित्यनाथले जिका भाइरस सहरमा छिटो फैलिएको उल्लेख गर्दै अधिकारीहरूलाई विशेष सावधानी अपनाउन र अनुगमन गर्न निर्देशन दिएको समाचार संस्था एएनआईले जनाएको छ ।

लामखुट्टेको टोकाइ र यौन सम्पर्कबाट सर्ने यो भाइरस मानिसको दिमाग खुम्चने र रोग प्रतिरक्षा प्रणाली कमजोर हुने विषयसँग जोडिएको हुन्छ ।

जिका भाइरस पहिलो पटक सन् १९४७ मा युगान्डाकाे बाँदरमा पहिचान भएको थियो । यसको अहिलेसम्म कुनै औषधि पत्ता नलागेकाले सङ्क्रमण हुनै नदिनु नै रोकथामको एकमात्र उपाय भएको डाक्टरहरूले  बताएका छन् ।