टी–ट्वान्टी विश्वकप : अष्ट्रेलियाको लगातार जित

काठमाडौं

आईसीसी टी–ट्वान्टी विश्वकप क्रिकेटमा अष्ट्रेलियाले दोस्रो जित निकालेको छ। दुबईमा बिहीबार राति सम्पन्न खेलमा लगातार दोस्रो जित निकाल्ने क्रममा अष्ट्रेलियाले श्रीलंकालाई ७ विकेटले पराजित गरेको हो।

श्रीलंकाले दिएको १ सय ५५ रनको लक्ष्य पछयाउँदै जवाफी ब्याटिङ गरेको अष्ट्रेलियाले १७ ओभरमा ३ विकेट गुमाएर पूरा गर्यो।

अष्ट्रेलियाको जितमा डेभिड वार्नरले ६५ रन बनाए। कप्तान आरोन फिन्चले ३७ रन जोड्दा ग्लेन म्याक्सवेल ५ रनमा आउट भए। त्यसैगरी, स्टिभ स्मिथ २८ तथा मार्कुस स्टोनिसले १६ रनमा अविजित रहे। श्रीलंकाका वानिन्दु हसरंगा डी सिल्भाले २ तथा डसुन शनकाले १ विकेट लिए।

यसअघि टस हारेर पहिले ब्याटिङ गरेको श्रीलंकाले २० ओभरमा ६ विकेट गुमाउँदै १ सय ५४ रन बनाएको थियो।
श्रीलंकाका लागि कुशल परेरा र चारिथ असलंकाले समान ३५ रन बनाउँदा भानुका राजपाक्षे ३३ रनमा अविजित रहेका थिए।

अष्ट्रेलियाका मिचेल मार्स, पाट कमिन्स र एडम जाम्पाले समान २/२ विकेट लिए।

जितसँगै अष्ट्रेलियाले २ खेलमा ४ अंक जोडेको अष्ट्रेलिया समूह ‘ए’को दोस्रो स्थानमा उक्लिएको छ।
पहिलो खेलमा अष्ट्रेलियाले दक्षिण अफ्रिकालाई ५ विकेटले हराएको थियो।

पहिलो खेलमा बंगलादेशलाई ५ विकेटले नै हराएको श्रीलंकाको सुपर १२ मा यो पहिलो हार हो। समान खेलबाट २ अंक जोडेको श्रीलंका चौंथो स्थानमा रहेको छ।