कोईली नदीको पुल निर्माणमा जग्गा विवाद, स्थानीयद्धारा अवरोध

कपिलवस्तु ।
कपिलवस्तुको बाणगंगा नगरपालिका वडा नम्बर ७ र ९ को सीमा क्षेत्रमा निर्माण सुरु भएको मोटरेवल पुलमा विवाद उत्पन्न भएको छ । कोइली नदीमा निर्माण गर्न लागिएको पुलको डिपिआर भएको स्थानमा जग्गा सम्बन्धी विवाद उतपन्न भएको हो ।

पुलको डिपिआर भई अहिले पुल निर्माण सुरु भएको छ । तर स्थानीयले निर्माण स्थलमा आफ्नो नम्बरी जग्गा भएको दावी गर्दै निर्माण कार्यमा अवरोध गरेका छन् । जग्गा धनीले हाल सो क्षेत्रमा तारबार गरेका छन भने बुधबार निर्माण कार्य नै रोक्न उनीहरुले दवाब दिएका छन् ।

जग्गा धनीले निर्माण कम्पनीलाई काम गर्न अवरोध गरेपछि बुधबार नै निर्माण स्थलमा लुम्बिनी प्रदेश सभा सदस्य विष्णु पन्थी सहित बाणगंगा नगरपालिकाका नगर उप प्रमूख चक्रपाणी अर्याल, वडा नम्बर ७ र ९ का वडा अध्यक्षद्धोय विष्णु गिरी र धुव्र बेल्वासे, नेकपा एमालेका जिल्ला अध्यक्ष झविलाल पोख्रेल लगाएतको टोलीले जग्गा धनी र निर्माण कम्पनीसँग संवाद गरेका छन् ।

कपिलवस्तुको पुरानो सडकको रुपमा रहेको जहदी–बनगाई– मोतिपुर–भलवाड–डोहोटे सडकको रुपमा रहेको सो सडक नक्सामा समेत छ । हाल बनगाई–मोतिपुर–भलवाड–डोहोटे सडक खण्डको मोतिपुर र भलवाडको सीमा क्षेत्रमा रहेको कोईली नदीमा कजवे रहेको स्थानको झण्डै २० मिटरको नजिकमा मोटरेवल पुल निर्माण गर्न लागिएको छ । सो पुल निर्माणको केही महिना अघि डिपिआर भएको थियो तर डिपिआर तयार गर्दा कुनै अवरोध सिर्जना भएको थिएन । हाल पुल निर्माण कार्य सुरु भईसकेपछि भने स्थानीले आफुहरुको जग्गामा पुल बन्न लाग्दा कुनै जानकारी नभएको भन्दै काममा अवरोध गरेका हुन ।

स्थानीय रमेश थापाले पुल बन्ने स्थानमा आफ्नो लालपुर्जा सहितको जग्गा रहेको बताएका छन् । उनले आफुलाई जग्गा उपलब्ध गराएर मात्रै पुल निर्माण गर्न दिने बताए ।

यस्तै विवाद उत्पन्न भएपछि निर्माण स्थलमा पुगेका सासंद पन्थी र उप प्रमुख अर्याल सहितको टोलीले तत्काल जिल्ला नापी कार्यालयबाट नक्साको सडकको नाप लिने र जग्गा रहेको वा नरहेको यकिन गरी विकल्प निकाल्ने निश्कर्ष निकालेका छन् । हाल सो क्षेत्रमा आफ्नो जग्गा रहेको भन्दै तीन जनाले दावी गरेका छन् । जग्गा रहेको भए निकास खोजीने तर तत्काल पुल निर्माणमा अवरोध नगर्न सासंद पन्थीले स्थानीयलाई आग्रह गरेका छन् ।

125