बाणगंगामा विद्यार्थीलाई कोरोना विरुद्धको खोप लगाउन सुरु

कपिलवस्तु ।
कपिलवस्तुको बाणगंगा नगरपालिकामा विद्यार्थीहरुको लागि एस्ट्रोजेनिका खोप लगाउन आज देखि सुरु गरीएको छ । १८ वर्ष उमेर पुगेका विद्यार्थीले नगरपालिकाका बिभिन्न ६ वटा केन्द्र अन्तरगत आफुलाई पायक पर्ने केन्द्रमा गएर खोप लगाउन सक्ने नगरपालिकाको स्वास्थ्य शाखाले जनाएको छ ।

आज पहिलो दिन एउटा मात्र खोप केन्द्रबाट खोप लगाएको छ । नगर स्वास्थ्य शाखा प्रमूख ठगराज पौडेलका अनुसार आज नियमित खोप कार्यक्रमको दिन परेकाले बुङ्चि खोप केन्द्रबाट मात्र ३ सय जना विद्यार्थीलाई खोप प्रदान गरिएको छ । भोली देखि भने नगरका छ वटै खोप केन्द्रबाट खोप कार्यक्रम संचालन हुने पनि पौडेलले जानकारी दिनुभयो ।

खोप लगाउने कार्यक्रम विहान साढे १० बजेपछि साढे ४ बजेसम्म निर्धारण गरिएको छ । विद्यार्थीहरुका लागि प्रदान गरिने खोप कार्यक्रम बुधबार सम्म संचालन हुने छ ।

३ दिनमा नगरका १ हजार ९ सय ७७ विद्यार्थीलाई खोप लगाउने लक्ष्य नगरपालिकाको छ । यो अभियान अन्तरगत झण्डै दुई हजार विद्यार्थी खोप कार्यक्रममा सहभागी हुने अनुमान गरिएको छ ।

खोप लगाउन आउँदा विद्यार्थीले विद्यालयले प्रमाणित गरेको नामावली, उमेर खुल्ने प्रमाणसहित परीक्षा प्रवेश पत्र र एक जना अनिवार्य शिक्षक प्रतिनिधि लिएर आउनु पर्ने स्वास्थ्य शाखा प्रमुख ठगराज पौडेलले बताउनुभयो ।