कपिलवस्तुमा भन्सार छलेर ल्याएका ८२ लाख बराबरको सामान बरामद

कपिलवस्तु
कपिलवस्तुको कृष्णनगर नाकाबाट भन्सार छलेर ल्याएको करीब ८२ लाख बराबरको छड बनाउने कच्चा पदार्थ बोकेको गाडी नेपाल भित्रिएपछि सशस्त्र प्रहरीले पक्राउ गरेको छ । हिजो (असार ३ ) गते बिहान ९ बजे भन्सारको मूल गेट हुँदै यु पी ५३ सी टी २११९ नम्बरको ट्रेलरमा फलामे छड बनाउन प्रयोग हुने कच्चा पदार्थ एम एस विलेट (फलाम) नेपाल भित्रिएको थियो ।

गाडीमा ३४.४ मेट्रिक टन विलेट विजया स्टिल प्रा.लि.का लागि भित्रिएको स्रोतले बताएको छ। सशस्त्र प्रहरी बल २८ नम्बर हेड क्वाटरका प्रमुख सशस्त्र प्रहरी उपरीक्षक धुव्रबहादुर कार्कीका अनुसार विशेष सूचनाका आधारमा विओपि कृष्णनगरले कृष्णनगर नगरपालिका २ मा रहेको चेक पोइन्टमा पक्राउ गरेको बताएका छन् । सशस्त्र प्रहरीले ट्रेलरसहित भारतको वरीयातपुर कुशिनगर बस्ने चालक ३४ वर्षीय सन्जय कुमार कुशवाह र सहचालक २४ वर्षीय अंगद कुमार कुशवाह लाई पक्राउ गरी कृष्णनगर भन्सार कार्यालयलाई बुझाइएको छ ।

भन्सार कार्यालय प्रमुख जर्नाधन पौडेलका अनुसार गाडी चालक नयाँ भएको कारणले थाहा नभएर भन्सार नगरी भित्रिएको बताए । विलेट लिएर आएका ५ वटा सँगैको लहरमा छिरेको र गेटमा बस्ने कर्मचारी झुक्किएर थाहा नपाएको बताए । पक्राउ गरिएको माल सम्बन्धी अनुसन्धान सुरु भएको पौडेलले बताएका छन् ।

101