रोनाल्डोले जब हटाइदिए कोका–कोलाको बोत्तल

काठमाण्डाै

पोर्चुगलको फुटबल टिमका कप्तान क्रिस्टियानो रोनाल्डोले हङ्गेरीसँगको खेलअघि गरेको व्यवहारले यतिखेर चर्चा पाएको छ ।

खेलअघिकाे पत्रकार सम्मेलनमा रोनाल्डोको अगाडि कोल्ड ड्रिङ्क बनाउने कम्पनी कोका–कोलाकाे दुई वटा बोत्तल राखिएको थियो । तर रोनाल्डोले कोका–कोलाको दुई वटै बोत्तल हटाइदिए । यतिमात्र नभइ उनले नजिकैको पानीको बोत्तललाई पहिले कोका–कोलाको बोत्तल राखिएको ठाउँमा राखिदिए । सफ्ट ड्रिङ्कको सट्टा पानीको प्रयोग गर्नुपर्ने रोनाल्डोले सङ्केत गरेका थिए ।

खासमा कोका–कोला युरो कपको प्रायोजकमध्ये एक कम्पनी हो । रोनाल्डोले कोका–कोलाको बोत्तल हटाउँदा कम्पनीकाे शेयर मूल्य घटेपछि चार बिलियन डलर घाटा बेहोर्नुपरेको बताइएको छ । कम्पनीको बजार मूल्य दुई सय ४२ बिलियन डलरबाट दुई सय ३८ बिलियन डलरमा झरेको बताइएको छ ।

हिजाे नै भएकाे युराे कपकाे दाेस्राे खेलअघिकाे पत्रकार सम्मेलनमा फ्रान्सका खेलाडी पावल पाेग्वाले आफ्नाे अघि राखेकाे हेनकेन रक्सीकाे बाेत्तल हटाइदिएका थिए ।

रोनाल्डो आफ्नो स्वास्थ्यप्रति निकै सजग रहन्छन् र आफ्नो छोरालाई पनि पेय पदार्थबाट टाढा राख्ने प्रयास गरिरहेको उनले बताउँदै आएका छन् ।

हिजो भएको खेलमा हङ्गेरीलाई पोर्चुगलले तीन–शून्यले हराउँदा रोनाल्डोले दुई गोल गरेका थिए । त्यो गोलसँगै रोनाल्डो युरो कप इतिहासकै सबैभन्दा धेरै ११ गोल गर्ने खेलाडी बनेका छन् । यस्तै उनी पाँच पटक युरो कप खेल्ने खेलाडी पनि बनेका छन् ।