बाणगंगामा एकैपटक १२२ जनामा कोरोना पुष्टि

कपिलवस्तुको बाणगंगा नगरपालिकामा एकैपटक एक सय भन्दा धेरैमा कोरोना संक्रमण पुष्टि भएको छ । नगरपालिकाले गरेको १ सय २५ जनाको नमुना परिक्षणमा एक सय २२ जनाको रिपोर्ट पोजेटिभ आएको नगरपालिकाका स्वास्थ्य शाखा प्रमूख ठगराज पौडेलले जानकारी दिनुभयो ।

बैशाख २२ गते गरिएको पिसीआर परिक्षणमा नगरपालिकामा यति धेरैमा एकैपटक संक्रमण पुष्टि भएको हो । थपिएका मध्ये तीन जना बुटवल स्थित कोरोना अस्पताल सँगै विभिन्न अस्पतालमा उपचार गराईरहेका छन भने अन्यले होम आईसोलेसनमा आराम गरिरहेको नगरपालिकाको स्वास्थ्य शाखाले जनाएको छ ।

अहिले कोरोनाको दोस्रो लहर समुदायका हरेक परिवारमा पुगिसकेको नगरपालिकाका स्वास्थ्य शाखा संयोजक पौडेलले बताउनुभयो । नगरपालिकाले बनाएको बुङ्चि आईसोलेसनमा समेत बिरामीहरु भरिभराउ छन भने अधिकाशं संक्रमितहरु आ आफ्नो घरमै बसेका छन् ।

अहिले अक्सिजन अभावका कारण बिरामीले उपचार पाउन नसकिरहेका बेला बाणगंगामा एकैपटक थपिएका ठूलो संख्याका संक्रमतिहरुको अवस्थाले नगरपालिकामा थप संकट पैदा गराएको छ । हरेक नागरिक सचेत हुनुपर्ने स्थिति आएको स्वास्थ्य शाखा प्रमूख ठगराज पौडेलले बताउनुभएको छ ।

100