जडेजा चम्किँदा चेन्नईले बेङ्गलाेरलाई हरायाे

काठमाण्डाै

रविन्द्र जडेजा चम्किँदा इण्डियन प्रिमियर लिग (आईपीएल) क्रिकेटमा चेन्नई सुपर किङ्ग्सले राेयल च्यालेन्जर्स बेङ्गलाेरलाई हराएकाे छ । मुम्बईमा आइतवार भएकाे पहिलाे खेलमा चेन्नईले बेङ्गलाेरलाई ६९ रनले हराएकाे हाे ।

रविन्द्र जडेजा ब्याटिङ र बलिङ दुवैमा चम्किएपछि बेङ्गलाेरले हार बेहाेरेकाे हाे । याे हारसँगै बेङ्गलाेरकाे अपराजित जितकाे यात्रा पनि ताेडिएकाे छ, लगातार चार खेल जितेकाे बेङ्गलाेर पाँचाैँ खेलमा पराजित भएकाे छ । ​चेन्नईले अन्तिम ओभरमा ३७ रन जाेड्दा जडेजाले पाँच छक्का र एक चाैका प्रहार गरे ।

चेन्नईले दिएकाे एक सय ९२ रनकाे लक्ष्य पछ्याएकाे बेङ्गलाेरले निर्धारित ओभरमा नाै विकेट गुमाउँदै एक सय २२ रनमात्र बनाउन सक्याे । बेङ्गलाेरका लागि देवदत्त पडिक्कलले ३४ र ग्लेन म्याक्सवेलले २२ रन बनाए ।

बेङ्गलाेरलाई कम याेगफलमै राेक्न रविन्द्र जडेजाले चार ओभरमा एक मेडन राख्दै १३ रन दिँदा तीन विकेट लिए । यस्तै इमरान ताहिरले दुई विकेट लिए ।

यसअघि टस जितेर पहिले ब्याटिङ गरेकाे चेन्नईले निर्धारित ओभरमा चार विकेट गुमाउँदै एक सय ९१ रन बनायाे । चेन्नईका लागि रविन्द्र जडेजाले २८ बलमा अविजित ६२ रन बनाए ।

जितसँगै चेन्नई पाँच खेलमा आठ अङ्कसहित अङ्क तालिककाे शीर्षस्थानमा उक्लिएकाे छ । पाँच खेलबाटै आठ अङ्क जाेडेकाे बेङ्गलाेर भने रनरेटका आधारमा दाेस्राे स्थानमा छ ।