कुष्ठरोग निवारणका लागि मोतिपुर स्वास्थ्य चौकीमा अन्तरक्रिया

कपिलवस्तु ।
कपिलवस्तुको वाणगंगा नगरपालिका वडा नम्बर ८ चप्परगाउँ स्थित मोतिपुर स्वास्थ्य चौकीमा कुष्ठरोग निवारण तथा रोगीहरुको पहिचान र उनीहरुको उपचारका लागि बिहिबार अन्तरक्रिया गरिएको छ ।

मोतिपुर स्वास्थ्य चौकीमा आयोजित अन्तरक्रियामा लेप्रोसी मिसन टु नेपालको आर्थिक सहयोग तथा मोतिपुर स्वास्थ्य चौकीको आयोजनामा महिला स्वास्थ्य स्वयम्सेवीकाहरुका लागि सो अन्तरक्रिया गरिएको स्वास्थ्य चौकी प्रमूख हिमलाल घिमिरेले बताउनुभयो ।

अन्तरक्रियामा कुष्ठरागका नयाँ बिरामी पत्ता लगाई उपचारमा ल्याउने, शंकास्पद बिरामीलाई उपचारमा ल्याई थप अङ्ग भङ्ग हुनबाट बचाउने तथा कुष्ठरोगलाई जनस्वास्थ्यको समस्याको रुपमा रहन नदिन शुक्रबार अर्थात बैशाख ३ गते देखि बाणगंगा नगरपालिका वडा नम्बर ७ र ८ का घरधुरीमा १५ जना महिला स्वास्थ्य स्वयमसेविकाहरुलाई परिचालन गरिने प्रमूख घिमिरेले जानकारी दिनुभयो ।

आगामी तीन दिन सम्म लगातार शंकास्पद बिरामी पहिचान गरी बैशाख ६ गते स्वास्थ्य चौकीमा कुष्ठरोग सम्बन्धी विशेषज्ञबाट रोगको पहिचान गरि उपचार पनि गरिने भएको छ ।

कार्यक्रममा बाणगंगा नगरपालिकाका स्वास्थ्य शाखा संयोजक ठगराज पौडेल, मोतिपुर स्वास्थय चौकी प्रमूख हिमलाल घिमिरे, लेप्रोसी मिसन टु नेपालमा कार्यसत नाथु देसार लगाएतले कार्यक्रमको सहजिकरण गर्नुभएको थियो । अन्तरक्रिया कार्यक्रममा मोतिपुर स्वास्थ्य चौकीमा कार्यरत कर्मचारीहरु तथा महिला स्वास्थ्य स्वयमसेविकाहरुको उपस्थिति रहेको थियो ।