कपिलधाममा पर्यटकको आकर्षण बढ्दो

राजेन्द्र खनाल, कपिलवस्तु

धार्मिक पर्यटकिय स्थलको रुपमा विकास हुँदै गएको कपिलवस्तुको कपिलधाम क्षेत्र यतिबेला अन्य समय भन्दा बढी व्यस्त देखिने गरेको छ । जाडोयामका बेला हुने वनभोज (पिकनिक) कार्यक्रम अन्यत्र जस्तै कपिलधाममा यस वर्ष उच्च संख्यामा हुने गरेका छन् जसका कारण कपिलधाम क्षेत्र पछिल्लो समय व्यस्त स्थलको रुपमा विकास भएको हो ।

वाणगंगा नगरपालिका वडा नम्बर ९ स्थित कपिल आरोग्य मन्दिर कपिलधाम र लुम्बिनी वाङ्मय प्रतिष्ठानको नजिकै रहेको खुल्ला क्षेत्रमा शुक्रबार वनभोज (पिकनिक) कार्यक्रम आयोजना गर्नेहरुको संख्या उच्च रहेको थियो । कपिल ऋषिको वस्तुस्थितिको अध्यनको क्षेत्रको रुपमा चिनिएको कपिलधाम धार्मिक वन सँगै जडिवुटी उत्पादन र विभिन्न अध्ययन गर्नेहरुका लागि पनि महत्वको क्षेत्रको रुपमा मानिएको छ ।

 

दैनिक अवलोकनकर्ताहरुको तथ्याङक लिने काम नभए पनि सामान्य दिनमा दैनिक एक सय भन्दा बढीले धामको अवलोकन गर्ने गरेको कपिल आरोग्य मन्दिर कपिलधामका अध्यक्ष शंकर प्रसाद आचार्यले ई–साझाकुरा सगँ बताउनुभयो । उहाँका अनुसार कपिलधाम अवलोकन गर्न र घुम्नका लागि सार्वजनिक विदाका दिन अत्याधिक चाप हुने गरेको छ । सार्वजनिक विदाका दिन कपिलधाममा ५ सय देखि १ हजार मानिसहरुले अध्ययन अवलोकन तथा घुमफिर गर्ने गरेका छन् ।

यस्तै वनभोज कार्यक्रमका लागि धामले सो स्थल निशुल्क प्रदान गर्ने गरेको अध्यक्ष आचार्यले बताउनुभयो । वाल उद्यान निर्माणका लागि तारबार गरिएको स्थानमा अहिले वनभोजका कार्यक्रम भईरहेको भए पनि धामले त्यस्ता कार्यक्रमका लागि छुट्टै स्थान बनाउने तयारी गरेको छ । अहिले पिकनिक कार्यक्रमका लागि आउने संघ सस्था तथा समुहहरुलाई निशुल्क स्थान उपलब्ध गराउँदा फोहोर व्यवस्थापनमा पनि समस्या भईरहेको आचार्यले बताउनुभयो ।