मन्त्री ज्ञवालीले भने घरभित्र समस्या आउन सक्छ तर सुल्झाउन बाह्य शक्ति निम्त्याउनु मुर्खता हो

पाल्पा, पुस १८

परराष्ट्र मन्त्री प्रदीप ज्ञवालीले प्रधानमन्त्रीको संसद विघटनको निर्णय संवैधानिक र लोकतान्त्रिक नै भएको बताउनुभएको छ । यस विषयको फैसला गर्ने अधिकार जनतामा नै निहीत रहेको उहाँको धारणा छ ।

नेपाल पत्रकार महासंघ पाल्पाले आयोजना गरेको पत्रकार भेटघाट कार्यक्रममा बाेल्दै उहाँले प्रतिनिधिसभा विघटन भएपछि सडकमा गएको खेमाले बाह्य शक्ति समेत निम्त्याएको आरोप लगाउनुभयाे । सबैको घरभित्र समस्या आउन सक्छ तर समस्या सुल्झाउने बाटो घरभित्रै हुँदाहुँदै बाह्य शक्ति निम्त्याउनु मुर्खता भएको भन्दै बाह्य शक्ति निम्त्याउने खेलको पर्दा समेत खुल्दै गएको उहाँले बताउनुभयाे ।

आफ्नै पक्षबाट सरकारलाई काम गर्नमा बाधा पुगेपछि बाध्यात्मक परिस्थितिका कारण संसद विघटनमा जानुपरेको प्रस्ट पार्दै मन्त्री ज्ञवालीले जनताको लामो योगदानबाट प्राप्त वर्तमान उपलब्धिलाई उल्टाउने कसैको पनि प्रयास सफल नहुने बताउनुभयो ।

एक फरक प्रसंगमा मन्त्री ज्ञवालीले आफूलाई नेकपाको प्रवक्ता बन्न कुनै निर्णय गर्नु नपर्ने धारणा राख्नुभयो । केन्द्रीय राजनीतिमा आफ्नो भुमिकाले त्यसको औचित्य पुष्टि गरिसकेको उहाँको भनाई थियाे ।

116