आज कुशे औँसी, अर्थात बुबाको मुख हेर्ने दिन

ई–साझाकुरा, भदौ ३

आज कुशे औँसी, अर्थात बुबाको मुख हेर्ने दिन। हिन्दु सनातन धर्म मान्नेहरुले आज बुवाकाे विशेष सम्मान गरी कुशे औंसी मनाउँदै छन्।

हरेक वर्षको भाद्र कृष्णपक्षको औँसी तिथिलाई पिताको मुख हेर्ने दिनको रुपमा मनाउने गरेका छन्। कुशे औँसीमा पिताको मुख हेर्ने, अर्थात बुवा दिवसको रूपमा मनाई बुवालाई विशेष सम्मान गर्ने र आमाबाबु नहुनेले तीर्थमा गोकर्ण र विष्णुपादुकामा श्राद्ध, तर्पण, दान, पुण्य तर्पण दिई सिदा दान गर्दा पितृको आर्शिवाद प्राप्त हुने धार्मिक विश्वास रहेको छ।

कुशको विशेष प्रकारको पवित्र मानिने औँठीलाइ घरमा राख्नु मात्र पनि पवित्र मानिने हुँदा पुरोहितहरू यजमानका घरघरै यही कुशे औँसीमा र्पुयाउने गर्छन् र यजमानहरूले पनि सिदा दक्षिणा आदि द्वारा पुरोहितलाई सम्मान गर्दछन्।

बुबा जो कहिले अभिभावक बनेर, कहिले कहिले असल शिक्षक बनेर, कहिले साथी बनेर र कहिले प्रेरणाको स्रोत बनेर हरेक पिताले आफ्ना छोराछोरीको भविष्यलाई सफल बनाउन लागिपरेका हुन्छन्। संसारका हरेक नयाँ चिजहरुसँग घुलमिल गराउन, उनीहरुलाई सही मार्गमा लैजान र सन्तानका आवश्यकतालाई आफ्नो भन्दा पहिलो प्राथमिकता दिएर पुरा गराउन सधैँ आमाबुवाले प्रयास गरिरहन्छन्। सन्तान जतिनै ठुलो भए पनि बुबाआमाको लागि भने आफ्ना सन्तान सधैभरि सानो र प्रिय रहन्छन्।

बुवाको यही त्याग, प्रेमलाइृ सम्मान गर्नको लागी पनि आको दिनलाई विशेष रुपमा मनाउने गरिएको छ । कुशेऔँसी तिथिहरुलाई विशेष गरेर पितृको सम्झना गर्न पनि महत्वपूर्ण मानिन्छ।

यस दिनमा पिताको भौतिक उपस्थिति हुने छोराछोरीले उनको मुख हेरेर मिठाई फलफूल कपडा आदि उपहार दिने चलन पनि चलिआएको पाईन्छ। यस दिनमा काठमाडौँको गोकर्णेश्वर महादेव, रसुवाको बेत्रावती, तनहुँको देवघाट, विष्णुपादुका तथा सुनसरीको बराहक्षेत्रलगायतका ठाउमा आजको दिन ठूलो भिड हुने गरेको छ।

240