कपिलवस्तुमा अवैध नदीजन्य पदार्थ बोकेका तीन टिप्पर नियन्त्रणमा

कपिलवस्तुमा अवैध रूपमा नदीजन्य पदार्थ ढुवानी गरिरहेका तीन वटा टिप्पर प्रहरीले नियन्त्रणमा लिएको छ।

इलाका प्रहरी कार्यालय गोरुसिङ्गेका प्रहरी निरीक्षक बाबुराम बस्नेतको नेतृत्वमा खटिएको प्रहरी टोलीले बुद्धभूमि नगरपालिका–१ वीरपुरस्थित वन क्षेत्रको भित्री सडक खण्डमा निगरानी गर्ने क्रममा ती टिप्पर नियन्त्रणमा लिएको हो।

जिल्ला प्रहरी कार्यालय कपिलवस्तुका सूचना अधिकारी प्रहरी नायब उपरीक्षक रिपेन्द्रकुमार सिंहका अनुसार लु १ क ४८७७, लु १ क ५५८४ र लु १ क ४६०१ नम्बरका टिप्परमा अवैध रूपमा मिस्कट (ढुंगा, गिट्टी र बालुवाको मिश्रण) ढुवानी भइरहेको अवस्थामा फेला परेका थिए।

प्रहरीले नियन्त्रणमा लिएका तीनै वटा टिप्परलाई आवश्यक कारबाहीका लागि बुद्धभूमि नगरपालिकामा बुझाएको जनाएको छ।

नगरपालिकाले अवैध रूपमा नदीजन्य पदार्थ ढुवानी गरेको अभियोगमा प्रतिटिप्पर ४० हजार रुपैयाँका दरले कुल १ लाख २० हजार रुपैयाँ जरिवाना गरेको प्रहरीले जनाएको छ।