लुम्बिनी सरकारको नीति तथा कार्यक्रम बहुमतले पारित

बुटवल । लुम्बिनी प्रदेश सरकारको आगामी आर्थिक वर्ष २०८३/८४ को वार्षिक नीति तथा कार्यक्रम बहुमतले पारित भएको छ । प्रदेश सभाको आठौँ अधिवेशन अन्तर्गत बुधबार बसेको आठौँ बैठकले नीति तथा कार्यक्रम बहुमतले पारित गरेको हो।

बैठकमा लुम्बिनी प्रदेशका मुख्यमन्त्री चेतनारायण आचार्यले आगामी आवकाे वार्षिक नीति तथा कार्यक्रम पारित गरियोस् भन्ने प्रस्ताव पेस गरेका थिए ।

उक्त प्रस्तावलाई निर्णयार्थ प्रस्तुत गर्दै सभामुख तुलाराम घर्तीमगरले बहुमतले नीति तथा कार्यक्रम पारित भएको घोषणा गरेका थिए ।

बैठकमा मुख्यमन्त्री आचार्यले नीति तथा कार्यक्रममाथि उठेका प्रश्नहरूको जवाफ दिँदै सरकारले यही नीति तथा कार्यक्रमका आधारमा आगामी बजेट निर्माण गर्ने स्पष्ट पारे ।

विपक्षी दलका नेता जोख बहादुर महरा ले विशेष समयमा सम्बोधन गरेका थिए। यसैबिच सामाजिक विकास मन्त्री जन्मजय तिमिल्सिनाले ‘थारु समुदायका प्रथाजनित परम्पराको संरक्षण सम्बन्धी विधेयक’ माथि सैद्धान्तिक छलफल गरियोस् भन्ने प्रस्ताव पेस गरेका थिए ।

उक्त प्रस्तावमाथि प्रदेश सभा सदस्यहरूले धारणा राखेका थिए भने मन्त्री तिमिल्सिनाले उठेका प्रश्नहरूको जवाफ दिएका थिए। प्रदेश सभाको आगामी बैठकको मिति सूचना मार्फत जानकारी गराइने जनाइएको छ।