गगनलाई राजीनामा नदिन कांग्रेसका केन्द्रीय सदस्यहरूकाे आग्रह

नेपाली कांग्रेसका केन्द्रीय सदस्यहरूले सभापति गगनकुमार थापालाई पदबाट राजीनामा नदिन आग्रह गरेका छन् । शनिबार बिहान बालुवाटारमा सभापति थापालाई भेटेर नेताहरूले राजीनामा नदिन सुझाएका हुन् । 

सहमहामन्त्री प्रकाश रसाइलीकाे नेतृत्वमा, मधु आचार्य, अजयबाबु शिवाकोटी, प्रमोद गुरागाईँलगायत नेताहरू सभापति थापालाई भेट्न पुगेका थिए ।

भेटमा समसामयिक घटनाक्रम, चुनावी समीक्षालगायतको विषयमा छलफल भएको नेताहरुले बताएका छन् ।

हालै सम्पन्न प्रतिनिधिसभाको चुनावमा कांग्रेसको लज्जास्पद हार भएपछि सभापति थापाले राजीनामा दिने बताएका थिए । सभापति थापाले यसअघि उपसभापति विश्वप्रकाश शर्मासँगको भेटमा आफूले राजीनामा दिने मनस्थिति बनाएको जिकिर गरेका थिए ।