भलवाड ब्याडमिण्टन खेलको बचत रकम ‘माहिरा’को उपचारमा सहयोग

साझाकुरा, कपिलवस्तु । लामो समय देखि वोनम्यारो क्यान्सरबाट पिडित बाणगंगा ९ की माहिरा विश्वकर्माको उपचारार्थ भलवाड ब्याडमिण्टन खेल समुहले आर्थिक सहयोग प्रदान गरेको छ । कपिलवस्तुको बाणगंगा ९ भलवाडमा आयोजना गरिएको प्रथम भलवाड ब्याडमिण्टन कपको समापन समारोबाट आयोजकले बालिकाको उपाचारमा सहयोग गरेको हो ।

भलवाड ब्याडमिण्टन कप आयोजनाका लागि विभिन्न संघ संस्था तथा व्यवसायीहरुको सहयोगबाट सफलता पुर्वक सम्पन्न भएपछि उक्त प्रतियोगिताबाट बचेको रकम बोनम्यारो क्यान्सर पिडित बालिका माहिराको उपचारमा सहयोग गर्ने निर्णय अनुसार सहयोग गरिएको खेल समुहका अध्यक्ष नमराज गुरुङ्ले जानकारी दिए । उनका अनुसार माहिराको उपचारमा खेल समुहले ८ हजार रुपैयाँ प्रदान गरेको हो । समापन समारोहबाट बालिकाकी हजुरआमा दिलमाया सुनारलाई वडा अध्यक्ष कमल पौडेलले उक्त रकम प्रदान गरे ।

प्रतियोगिताका खेल संयोजक ज्ञानु बुढा मगर र आयोजक समुहका सदस्य रोशन बुढामगरले पहिलो पटक भलवाडमा ब्याडमिण्टन खेल आयोजना गर्दा यहाँका सबै संघसंस्था र व्यक्तिहरुको सहयोग प्राप्त भएको भन्दै यो सहयोग माहिराको उपचारमा सामान्य मलहम बन्न सकियोस भन्ने उद्धेश्यले सहयोग गरिएको बताए ।

माहिरा हाल काठमाण्डौँ स्थित पाटन अस्पतालमा उपचाररत छिन् । उनको थप उपचारका लागि भारत लैजान चिकित्सकले सुझाएपछि परिवार अहिले रकम जोहो गर्ने चिन्तामा छन् । उनी वडा नम्बर ९ भर्तापुर स्थित मनु विश्वकर्माकी छोरी हुन । ६ वर्षीय माहिराको जीवन रक्षाका लागि पछिल्ला दिनमा देश विदेशबाट सहयोगको अपिल पनि गरिएको छ ।