एनपीएलकाे प्लेअफ समीकरण पूरा, अब यसरी हुने छ फाइनल

काठमाडौं । नेपाल प्रिमियर लिगको प्लेअफ समीकरण पूरा भएको छ । यससँगै अब प्लेअफमा खेल्ने ४ टोली निश्चित भएका छन् र ४ टोली बाहिरिएका छन् । राउण्ड रोबिन फरम्याटमा भइरहेको एनपीएलमा अब प्लेअफका खेलहरु क्वालिफायर, इलिमिनेटर र फाइनलको रुपमा हुनेछन् ।

एनपीएलमा प्लेअफको पहिलो खेल इलिमिनेटर खेलाइने तय भएको छ । यो खेल तेस्रो स्थानको चितवन राइनोज र चौथो स्थानको कर्णाली याक्सबीच हुनेछ । बुधबार बिहान ९ बजे हुने यो खेल हार्ने टिम प्रतियोगिताबाट बाहिरिनेछ ।

सोही दिन दिउँसो १ बजे क्वालिफायर १ खेलाइनेछ । यो खेल पहिलो स्थानको सुदूरपश्चिम रोयल्स र दोस्रो स्थानको जनकपुर बोल्ट्सबीच हुनेछ । यो खेल जित्ने टोली सोझै फाइनलमा जानेछ । हार्ने टोलीले पनि अर्को एक अवसर पाउनेछ ।

बिहीबार दिउँसो साढे १२ बजे क्वालिफायर २ खेल हुनेछ । यो खेल इलिमिनेटरको विजेता र क्वालिफायर १ मा हार्ने टिमबीच हुनेछ । यो खेल जित्ने टिमले क्वालिफायर १ जित्ने टोलीसँग फाइनल खेल्नेछ । फाइनल शनिबार दिउँसो साढे १२ बजे हुनेछ ।