दोस्रो टेस्ट क्रिकेटमा भारतले इङ्ग्ल्यान्डलाई फराकिलो अन्तरले हरायो

काठमाण्डाै – भारतले दोस्रो टेस्ट क्रिकेटमा घरेलु टोली इङ्ग्ल्यान्डलाई हराएको छ । लर्डसमा भएको खेलमा भारतले इङ्ग्ल्यान्डलाई १ सय ५१ रनको फराकिलो अन्तरले हराएको हो । जितसँगै भारतले पाँच खेलको श्रृङ्खलामा १–० को अग्रता बनाएको छ ।

पहिलो पारीमा २७ रनले पछि परेको भारतले २ सय ९८ रन बनाउँदै दोस्रो पारी अन्त्यको घोषणा गरेको थियो । २ सय ७२ रनको लक्ष्य पाएको इङ्ग्ल्यान्ड १ सय २० रनमा अलआउट भयो । उसका कप्तान जोए रुटले ३३, जोस बट्लरले २५ तथा मोइन अलीले १३ रन बनाए ।

भारतका मोहमद सिराजले ४ विकेट लिए । जस्प्रित बुम्राहले ३ तथा इशान्त शर्माले २ विकेट लिए । दोस्रो पारीमा भारतका अजिन्का रहानेले ६१ तथा मोहमद शामीले ५६ रनको अर्धशतकीय पारी खेले । इङ्ग्ल्यान्डका मार्क उडले ३ तथा मोइन अली र ओली रोबिनसनले २/२ विकेट लिए ।

पहिलो पारीमा इङ्ग्ल्यान्डले ३ सय ९१ रन बनाएको थियो । उसका जोय रुटले शतक प्रहार गरेका थिए । पहिलो टेस्ट वर्षाले प्रभावित हुँदा बराबरीमा सकिएको थियो । पाँच टेस्टको श्रृङ्खला खेल्न भारत इङ्ग्ल्यान्ड भ्रमणमा छ ।