हङकङले दियो नेपाललाई २६२ रनको लक्ष्य

 बाबर हायतको शतकमा हङकङले एसीसी प्रिमियर कपमा नेपालसामु २६२ रनको लक्ष्य प्रस्तुत गरेको छ ।

मंगलबार मलेसियाको बायोमास ओभलमा टस जितेर ब्याटिङ रोजेको हङकङले निर्धारित ५० ओभरमा सात विकेट गुमाएर २६१ रनको योगफल तयार पारेको हो । 

हङकङका हायतले अविजित ११७ रनको योगदान गरे । उनले १२६ बलमा सात चौका र सात छक्का प्रहार गरे । यसैगरी, शाहिद वासिफले ४५, एहसान खानले अविजित ३५, जिशन अलीले १५ र अन्शुमन रथले १३ रन बनाए । 

आठौँ विकेटका लागि हायत र खानले अविजित १२८ रनको साझेदारी गरेका थिए । 

नेपालका कप्तान सन्दीप लामिछानेले चार र शेर मल्लले तीन विकेट लिए ।