पछिल्लो तीन घण्टामा रोल्पाको लिबाङ गाउँमा सबैभन्दा बढी वर्षा

पछिल्लो तीन घण्टामा सबैभन्दा बढी वर्षा रोल्पाको लिबाङ गाउँमा भएको छ । जल तथा मौसम विज्ञान विभागले आइतबार साँझ जारी गरेको सूचनाअनुसार, पछिल्लो तीन घण्टामा रोल्पाको लिबाङ गाउँमा ६३.४ मिमि वर्षा भएको छ ।

“पछिल्लो तीन घण्टामा सबैभन्दा बढी वर्षा रोल्पा जिल्लाको लिबाङ गाउँमा ६३.४ मिमि भएको छ,” विभागले जारी गरेको सूचनामा भनिएको छ ।

विभागका अनुसार, हाल कर्णाली तथा लुम्बिनी प्रदेशका थोरै स्थानमा र कोसी, वागमती तथा गण्डकी प्रदेशका एक–दुई स्थानमा मध्यमसम्मको वर्षा भइरहेको छ ।

आज राति हिमाली भू–भागका थोरै स्थानमा मेघगर्जन/चट्याङसहित मध्यमसम्मको वर्षा/हिमपातको सम्भावना छ । कोसी र सुदूरपश्चिम प्रदेशका पहाडी र तराई भू–भागका केही स्थानमा, कर्णाली प्रदेशका पहाडी भू–भाग, वाग्मती, गण्डकी र लुम्बिनी प्रदेशका पहाडी र तराई भू–भागका थोरै स्थानमा मेघगर्जन/चट्याङसहित मध्यमसम्मको वर्षाको सम्भावना रहेको विभागले जनाएको छ ।

मधेस प्रदेशका एक–दुई स्थानमा मेघगर्जन/चट्याङसहित मध्यमसम्मको वर्षाको सम्भावना छ । कोसी, गण्डकी र सुदूरपश्चिम प्रदेशका पहाडी भू–भागका एक–दुई स्थानमा भारी वर्षाको सम्भावना रहेको छ ।