बुटवलको इँटाभट्टीमा ईभी हायस र ई-रिक्सा आपसमा ठोक्किँदा दुई जना गम्भीर घाइते

बुटवल । बुटवलको इँटाभट्टीमा ईभी हायस र ईरिक्सा आपसमा ठोक्किँदा दुई जना गम्भीर घाइते भएका छन् ।

बुटवल उपमहानगरपालिका–९, इँटाभट्टीस्थित भित्री सडकखण्डमा तीनकुनेबाट बसपार्क आउँदै गरेको बाप्र०३–००१ ज १२२९ नम्बरको हायस र विपरीत दिशाबाट आइरहेको रा१ह ४४३४ नम्बरको ईरिक्सा ठोक्किएका प्रहरीले जनाएको छ ।

जिल्ला प्रहरी कार्यालय बुटवलका प्रमुख डीएसपी निशान्त श्रीवास्तवका अनुसार दुर्घटनामा अर्घाखाँचीको पाणिनि गाउँपालिका घर भई हाल बुटवल उपमहानगरपालिका–१ बस्ने ३२ वर्षीय ईरिक्सा चालक गोविन्द विक र इरिक्सामा सवार बुटवल–२, मैनाबगर बस्ने २३ वर्षीया कृतिका आले मगर गम्भीर घाइते भएका छन् ।

घाइते विकको टाउको र शरीरका विभिन्न भागमा चोट लागेको छ भने मगरको दुवै खुट्टा र टाउकोमा गम्भीर चोट लागेको छ । घाइते दुवै जनाको लुम्बिनी प्रादेशिक अस्पताल बुटवलमा उपचार भइरहेको प्रहरीले जनाएको छ ।

इलाका प्रहरी कार्यालय बुटवलले चितवन भरतपुर महानगरपालिका–१५ रामपुर बस्ने ३४ वर्षीय हायसका चालक साजन परियारलाई नियन्त्रणमा लिएको छ । दुर्घटनामा संलग्न हायस र ईरिक्सा पनि प्रहरीको नियन्त्रणमा छ ।