कपिलवस्तुमा लगाइएको निषेधाज्ञा हटाइयो

जिल्लाको महाराजगञ्ज नगरपालिका-२ अन्तर्गत वर्गदामा भएको घटनापछि जारी गरिएको निषेधाज्ञा आदेश हटाइएको छ ।

जिल्ला प्रशासन कार्यालय तौलिहवाले सूचना जारी गर्दै शान्ति सुरक्षाको अवस्था सामान्य बन्दै गएको तथा नागरिकको दैनिकी सहज बनाउन आवश्यक देखिएकाले निषेधाज्ञा हटाइएको जनाएको हो ।

जिल्ला सुरक्षा समितिको मिति २०८२ चैत्र १० गतेको निर्णयअनुसार सोही दिन बिहान ९ बजेदेखि लागू हुने गरी निषेधाज्ञा आदेश हटाइएको जिल्ला प्रशासन कार्यालयले जनाएको छ ।

यसअघि मिति २०८२ चैत्र ७ गते दिउँसो २ बजे र चैत्र ८ गते दिउँसो १ बजेबाट जिल्लाका विभिन्न क्षेत्र तोकेर निषेधाज्ञा जारी गरिएको थियो ।

सहायक प्रमुख जिल्ला अधिकारी भविश्वर घिमिरेले शान्ति सुरक्षाको अवस्था क्रमशः सामान्य बन्दै गएको, सरोकारवालासँग समन्वय गरी स्थिति नियन्त्रणमा ल्याइएको र अब नागरिकलाई सहज रूपमा आवतजावत तथा दैनिक कामकाज गर्न वातावरण बनेकाले निषेधाज्ञा हटाइएको बताउनुभयो ।

उहाँले सामाजिक सद्भाव, शान्ति सुरक्षा र कानुन व्यवस्था कायम राख्न सबै पक्षलाई संयमता अपनाउन आग्रह समेत गर्नुभयो ।