इरानका सुरक्षा प्रमुख अली लारिजानी मारिएको इजरायली रक्षामन्त्रीको दाबी

इजरायलले इरानमा गरिएको कारवाहीमा परी सुरक्षा प्रमुख अली लारिजानी मारिएको दाबी गरेको छ । इजरायली रक्षामन्त्री इजरायल कट्जले लारिजानी मारिएको दाबी गरेका हुन् । यसबारे इरानी पक्षले कुनै टिप्पणी गरिसकेको छैन ।

सन् १९५८ मा इराकको नजफमा जन्मिएका लारिजानी इरानको राजनीतिमा सन्तुलित र व्यावहारिक नेताका रूपमा चिनिन्थे । उनलाई इरानको शक्तिशाली परिवारको सदस्य मानिन्छ ।

लारिजानीले गणित र कम्प्युटर विज्ञानमा स्नातक गरेपछि इमानुएल कान्टको दर्शनमा विद्यावारिधि गरेका थिए । सन् १९७९ को क्रान्तिपछि उनी इरानी रिभल्युसनरी गार्ड कोर आईआरजीसीमा आबद्ध थिए । पछि उनले संस्कृतिमन्त्री तथा सरकारी सञ्चारमाध्यमको प्रमुखका रूपमा काम गरे ।

सन् २००५ मा उनी सर्वोच्च राष्ट्रिय सुरक्षा परिषद्को सचिव र इरानको मुख्य परमाणु वार्ताकार बनेका थिए । त्यसपछि उनी लगातार तीन कार्यकालसम्म इरानको संसदको सभामुख रहे ।

सन् २०१५ को परमाणु सम्झौता कार्यान्वयनमा उनले महत्वपूर्ण भूमिका खेलेका थिए । अमेरिका र इजरायलसँगको बढ्दो तनावका बीच उनी इरानको रणनीतिक योजनाकारका रूपमा सक्रिय थिए ।