तौलिहवामा दुई मोटरसाइकल ठोक्किँदा एकको मृत्यु, दुई घाइते

कपिलवस्तु | कपिलवस्तु नगरपालिका–४ छोट्की (तौलिहवा)स्थित हुलाकी सडकखण्डमा शुक्रबार साँझ दुई मोटरसाइकल आपसमा ठोक्किँदा एकजनाको मृत्यु भएको छ भने दुईजना घाइते भएका छन्।

जिल्ला प्रहरीका अनुसार साँझ करिब १७ः३५ बजे तौलिहवाबाट कोदहवा तर्फ जाँदै गरेको लु २५ प ५७५९ नम्बरको १२५ सीसी डिस्कभर मोटरसाइकल र विपरीत दिशाबाट आउँदै गरेको लु ३३ प ६७८६ नम्बरको १५० सीसी सुपर स्प्लेन्डर मोटरसाइकल एकापसमा ठोक्किएका थिए।

दुर्घटनामा सुपर स्प्लेन्डरका चालक कपिलवस्तु नगरपालिका–४ पिपरी निवासी १८ वर्षीय सोनु कोरी गम्भीर घाइते भएका थिए। उपचारका लागि जिल्ला अस्पताल तौलिहवा पठाइएकोमा साँझ १७ः५० बजे चिकित्सकले उनलाई मृत घोषणा गरेका प्रहरीले जनाएको छ।

घाइते हुनेमा सुपर स्प्लेन्डरमा पछाडि सवार कपिलवस्तु नगरपालिका–९ निग्लिहवा निवासी २५ वर्षीय धिरज बढई रहेका छन्। उनको बायाँ खुट्टामा फ्र्याक्चर भएको र अवस्था मध्यम रहेको बताइएको छ। त्यसैगरी डिस्कभरका चालक कपिलवस्तु नगरपालिका–३ सिकटवा निवासी १८ वर्षीय अरमान दर्जीको शरीरका विभिन्न भित्री भागमा चोट लागेको छ। उनको अवस्था पनि मध्यम रहेको अस्पताल स्रोतले जनाएको छ।

दुर्घटनापछि दुवै मोटरसाइकल प्रहरीले नियन्त्रणमा लिएको छ भने घटनाबारे थप अनुसन्धान भइरहेको प्रहरीले जनाएको छ।