कार्यसम्पादन मूल्याङ्कनमा कुनै पनि प्रदेशले ५० अङ्क ल्याएनन्, पाचौँ स्थानमा लुम्बिनी

प्रदेशको कार्यसम्पादन मूल्याङ्कनमा सुदूरपश्चिम प्रदेश पहिलो भएको छ । राष्ट्रिय प्राकृतिक स्रोत तथा वित्त आयोगले आज सार्वजनिक गरेको आर्थिक वर्ष २०८१/८२ को कार्यसम्पादन मूल्याङ्कनअनुसार सुदूरपश्चिम प्रदेशले ४५.७० अङ्क प्राप्त गरेर पहिलो भएको हो ।

दोस्रो स्थानमा रहेको काेशीले ४४.२९ अङ्क पाएको छ भने तेस्रो स्थानमा रहेको बागमतीले ४२.४६ अङ्क पाएको छ । सबैभन्दा कमजोर मधेशले २७.२८ अङ्क मात्रै पाएको छ । यस्तै कार्यसम्पादन मूल्याङ्कनको पाचौँ स्थानमा लुम्बिनी प्रदेश रहेको छ ।

कुनै पनि प्रदेशले ५० अङ्क पनि पुर्‍याउन नसकेका कारण सबै प्रदेशको कार्यसम्पादन कमजोर देखिएको छ ।

यो मूल्याङ्कन आउँदो आर्थिक वर्ष २०८३/८४ को बजेटमा वित्तीय समानीकरण अनुदान सिफारिश गर्दा लिइने आधारमध्ये एक हो । धेरै अङ्क ल्याउने सरकारले बढी अनुदान पाउने गर्छन् ।

आयोगले प्रदेशमा ११ सूचकका आधारमा मूल्याङ्कन गरेको हो । प्रदेशको पहिलो सूचकमा अघिल्लो आर्थिक वर्षको लेखापरीक्षणबाट देखिएको बेरुजु अवस्था लिइएको छ । यस्तै कानूनअनुसार सशर्त अनुदान दिए/नदिएको, विनियोजन गरिएको बजेट खर्चको अवस्थालगायतका सूचक छन् ।