सरकारले भेट्टाएन पुरस्कार पाउन लायक कर्मचारी

निजामती सेवा दिवसका अवसरमा हरेक वर्ष उत्कृष्ट कर्मचारीलाई पुरस्कृत गर्दै आएको सरकारले यस वर्ष भने कुनै पनि कर्मचारीलाई पुरस्कार नदिने निर्णय गरेको छ ।

‘व्यावसायिक र सिर्जनशील प्रशासनः विकास, समृद्धि र सुशासन’ भन्ने नाराका साथ मनाइएको २२औँ निजामती सेवा दिवसको मूल समारोह भृकुटीमण्डपस्थित नेपाल पुलिस क्लबमा आयोजना गरिएको छ । बिहान सिंहदरबारबाट प्रभातफेरी निकालेर दिवसको औपचारिक कार्यक्रम सुरु गरिएको थियो ।

निजामती सेवामा रहेका करिब ८५ हजार कर्मचारीका लागि यो दिवस ठूलो उत्सव र कदर गर्ने दिनका रूपमा लिने गरिएको छ । विगतमा सरकारका तर्फबाट एक जनालाई ‘सर्वोत्कृष्ट’, १० जनालाई ‘उत्कृष्ट’ तथा ३० जनालाई ‘निजामती सेवा पुरस्कार’ प्रदान गरिँदै आएको थियो । तर, यस वर्ष मन्त्रिपरिषद्को स्वीकृति नपाएकाले पुरस्कार वितरण हुन नसकेको कर्मचारी कल्याण महाशाखाकी शाखा अधिकृत सीतादेवी थापाले जानकारी दिइन् ।

प्रधानमन्त्रीको उपस्थिति रहने परम्परा भए पनि यसपटक प्रधानमन्त्री केपी शर्मा ओली कार्यक्रमस्थल पुगेनन् । उनको तर्फबाट उपप्रधानमन्त्री प्रकाशमान सिंहले सहभागिता जनाएका छन् ।

यसअघि २०७३ सालमा तत्कालीन सचिव शान्तराज सुवेदीले ‘सर्वोत्कृष्ट निजामती सेवा पुरस्कार’ प्राप्त गरेका थिए । त्यसयता नौ वर्षदेखि सर्वोत्कृष्ट कर्मचारी चयन हुन सकेको छैन ।

निजामती सेवा ऐन २०१३ साल भदौ २२ गते तत्कालीन प्रधानमन्त्री टंकप्रसाद आचार्यको नेतृत्वमा लागू भएको दिनलाई स्मरण गर्न २०६२ सालदेखि ‘निजामती सेवा दिवस’ मनाउन थालिएको हो ।

दिवसका अवसरमा प्रधानमन्त्री ओलीले शुभकामना दिँदै बदलिँदो विश्व परिस्थिति, नवीन प्रविधि र जनअपेक्षाअनुरूप निजामती कर्मचारीले आफूलाई रुपान्तरण गर्नुपर्ने आवश्यकता औंल्याएका छन् ।