अर्घाखाँचीमा जीप दुर्घटना, दुईजना गम्भीर घाइते

अर्घाखाँचीको पाणिनी गाउँपालिका–७, एक्लेभिरमा  बिहीबार बिहान लु १ ज ४९१५ नम्बरको बलेरो जिप दुर्घटना भएको हो । छत्रदेव गाउँपालिकाबाट बुटवलतर्फ बलेरो जीप अनियन्त्रित भई सडक किनारमा दुर्घटना हुँदा तीनमध्ये दुई जना यात्रु गम्भीर घाइते बनेका छन् ।

जिल्ला प्रहरी कार्यालय अर्घाखाँचीका प्रमुख चक्र मल्लका अनुसार दुर्घटनामा घाइते भएकामध्ये दुबैजनाको अवस्था गम्भीर छ भने अर्का एक जना सकुशल रहेका छन् । घाइतेहरुलाई तत्कालै उपचारका लागि जिल्ला अस्पताल पुर्‍याइएको प्रहरीको भनाइ छ ।

दुर्घटनाको वास्तविक कारणबारे अनुसन्धान भइरहेको प्रहरीले जनाएको छ । ग्रामीण बाटोमा तीव्र गतिमा सवारी चलाउँदा निरन्तर दुर्घटनाका समाचार आउने गरेकाले स्थानीयवासीले चिन्ता व्यक्त गरेका छन् ।