चैत नलाग्दै कपिलवस्तुसहित तराईका जिल्लामा चर्काे घाम र हावाहुरी, आगलागी र डढेलाेकाे जाेखिम !

तराईमा चर्को घाम र हावाहुरीसँगै आगलागीको जोखिम । (तस्बिर : फाइल)

साझाकुरा । फागुन महिनाको मध्य भागबाटै तराई क्षेत्रमा चर्को घाम र हावाहुरी सुरु भएसँगै आगलागी तथा वन डढेलोको जोखिम बढेको छ। सुख्खा मौसम समयभन्दा अगाडि नै सुरु भएकाले कपिलवस्तु लगायतका तराईका जिल्लामा केही दिनयता हावाहुरी तीव्र बनेको छ।

विशेष गरी सामुदायिक वन क्षेत्रमा वन डढेलो लाग्ने सम्भावना उच्च रहेको छ, जसले वन्यजन्तु तथा वनजन्य स्रोतसाधनलाई ठूलो असर पुर्याउने देखिन्छ। वनमा लागेको आगो छिट्टै नियन्त्रण गर्न कठिन हुने भएकाले यसले वनस्पति तथा जीवजन्तुको बासस्थान ध्वस्त पार्ने खतरा बढेको छ।

यसैगरी, हावाहुरीका कारण विभिन्न बस्ती तथा मानव बस्तीमा समेत आगलागीको जोखिम बढेको छ। सुख्खा मौसमले गर्दा एकपटक आगलागी सुरु भएमा द्रुत गतिमा फैलिने सम्भावना रहन्छ। यसले धनजनको समेत ठूलो क्षति पुर्याउने भएकाले स्थानीय प्रशासन र सम्बन्धित निकायलाई सचेत रहन आवश्यक देखिन्छ।

प्राकृतिक विपत्तिबाट जोगिनका लागि सचेतना अभियान सञ्चालन गर्नुका साथै, स्थानीय समुदाय, वन उपभोक्ता समूह तथा प्रशासन मिलेर सम्भावित जोखिम न्यूनीकरणका उपाय अवलम्बन गर्नुपर्ने विज्ञहरू बताउँछन्। आगलागी तथा वन डढेलो नियन्त्रणका लागि आवश्यक साधनस्रोत तयारी अवस्थामा राखिनु पर्ने आवश्यकता रहेको छ।