एनपीएलको फाइनल हेर्न प्रचण्डदेखि गृहमन्त्रीसम्म कीर्तिपुर मैदान पुगे

त्रिभुवन विश्वविद्यालय अन्तर्राष्ट्रिय क्रिकेट मैदान कीर्तिपुरमा नेपाल प्रिमियर लिग (एनपीएल)को फाइनल खेल भइरहेको छ । उपाधिका लागि सुदूरपश्चिम रोयल्स र जनकपुर बोल्ट्स भिडिरहेका छन् ।

खेल हेर्नका लागि पूर्वप्रधानमन्त्री एवं नेकपा मा‌‌ओवादी केन्द्रका अध्यक्ष पुष्पकमल दाहाल ‘प्रचण्ड’देखि गृहमन्त्री रमेश लेखकसम्म त्रिवि मैदान कीर्तिपुर पुगेका छन् ।

यस्तै, उद्योगमन्त्री दामोदर भण्डारी, मधेश प्रदेशका मुख्यमन्त्री सतीश कुमार सिंह लगायत पनि खेल हेर्न र खेलाडीलाई हौसला प्रदान गर्न कीर्तिपुर मैदान पुगेका छन् ।

विभिन्न दलका सांसद र पूर्वमन्त्रीहरू पनि कीर्तिपुर पुगेर खेल हेरिरहेका छन् ।

सुदूरपश्चिमसामु आफ्नो परिचित प्रतिद्वन्द्वीमाथि जीतको ह्याट्रिक गरेर उपाधि जित्ने अवसर छ भने जनकपुरसामु दुई हारको मीठो बदला लिएर उपाधि उचाल्ने अवसर छ ।

सुदूरले लिग चरणमा खेलेका सातमध्ये ६ खेल जितेको थियो भने चितवन राइनोजसँग मात्र पराजित भएको थियो । जनकपुरले लिग चरणमा चितवनसहित सुदूरपश्चिमसँग पनि हार व्यहोरेको थियो । जनकपुरले लिग चरणमा ७ मध्ये ५ खेल जितेर दोस्रो स्थानमा रहेको थियो ।

एनपीएलमा जनकपुर र सुदूरपश्चिम तेस्रोपटक भिड्न लागेका हुन् । यसअघि नै दुईपटक यी टोलीबीच खेल भइसकेको छ । जनकपुर दुईपटक सुदूरपश्चिमसँग पराजित भएको थियो ।

पहिलो क्वालिफायरमा जनकपुर सुदूरसँगै पराजित भएको थियो । दोस्रो क्वालिफायरमा कर्णाली याक्सलाई हराएर जनकपुर फाइनल पुगेको हो । ​

प्रतियोगिताको विजेताले एक करोड १० लाख र उपविजेताले ५० लाख रुपैयाँ पाउने छन् ।