प्रतिभाशाली क्रिकेटर छनोटका लागि लुम्बिनी लायन्सले ट्यालेन्ट हन्ट आयोजना गर्दै

काठमाडौँ । नेपाल प्रिमियर लिग (एनपीएल) को फ्रेन्चाइज टोली लुम्बिनी लायन्सले युवा तथा प्रतिभाशाली क्रिकेटर छनोटका लागि ट्यालेन्ट हन्ट आयोजना गर्दैछ ।

ट्यालेन्ट हन्टबाट ४ खेलाडी छनोट गरिने क्लबले जनाएको छ । यसरी छनोट भएकामध्ये एक जनाले ‘सुपरस्टार’ को उपाधि सहित नगद १ लाख रुपैयाँ पाउनेछन् । साथै एनपीएलमा अन्य खेलाडीहरुसँग खेल्ने अवसर पनि पाउनेछन् ।

बाँकी ३ खेलाडीहरूले ‘स्टार’ को उपाधि प्राप्त गर्नेछन् जसले लुम्बिनी लायन्सको प्रशिक्षणहरुमा सहभागी हुन पाउनेछ ।

लुम्बिनी लायन्सका सञ्चालक ईश्वर जिसीले लुम्बिनी प्रदेशबाट क्रिकेट प्रतिभा खोजिने बताए । लुम्बिनी लायन्सको फेसबुक तथा इन्स्टाग्राम पेजमा गरिएको ट्यालेन्ट हन्टको पोस्टमा रहेको रजिस्ट्रेसन लिङ्कमा क्लिक गरेर आवेदन प्रक्रियाको बारेमा जानकारी लिन सकिनेछ ।

१८ कात्तिकसम्म आवेदन बुझाउनुपर्नेछ । सर्टलिस्टमा परेकाहरूको नाम २० कात्तिकमा घोषणा गर्ने र ट्रायलको मिति तथा स्थान पनि तोकिने लुम्बिनी लायन्सले जनाएको छ ।