‘पोन्ड क्रस कन्टेस्ट विथ रोप’ को उपाधि विशाल थारुलाई

कपिलवस्तुको बाणगंगा नगरपालिका– ३ राजापानीमा भएको ‘पोन्ड क्रस कन्टेस्ट विथ रोप’ (डोरीमा झुन्डिएर पोखरी पार गर्ने खेल) को उपाधि विशाल थारुले जितेका छन् । लायन्स क्लव अफ कपिलवस्तुको आयोजना बुधबार भएको उक्त साहसिक खेलको सिनियरतर्फको विजेता भएसंगै थारुले नगद ५१ हजार १११ रुपैयाँसहित विभिन्न गिफ्ट ह्याम्पर पाए ।

यस्तै सुशील थारु द्धितीय र रोशन श्रेष्ठले तृतीय हुन सफल भए । द्धितीय हुनेले २५ हजार १११ र तृतीय हुनेले १५ हजार १११ रुपैयाँ प्राप्त गरे । जुनियरतर्फको विजेता अभिषेक खड्का भए । उनले ११ हजार १११ प्राप्त गरे । यस्तै जुनियर तर्फ नै कपिल सापकोटा द्धितीय र सौरभ शर्मा तृतीय भए । सापकोटाले सात हजार १ सय ११ र शर्माले ५ हजार १११ रुपैयाँ प्राप्त गरे ।

सिनियरका लागी ४८ मिटर र जुनियरका लागी २५ मिटरको दुरी निर्धारण गरिएको थियो । यद्यपी प्रतियोगितामा सहभागी हुने कुनै पनि प्रतियोगिले निर्धारित दुरी पार गर्न सकेनन् । खेल सिनियर र जुनियर गरि दुई उमेर समूहमा विभाजन गरि खेलाईएको थियो ।

जुनियरतर्फ ८ देखि १६ बर्षका बालबालिकाहरु सहभागी थिए भने सिनियरतर्फ १७ बर्षदेखि माथिका व्यक्तिहरुले भाग लिन लिएका थिए । लायन्स क्लव अफ कपिलवस्तुले पोन्ड क्रस कन्टेस्ट विथ रोप’ (डोरीमा झुन्डिएर पोखरी पार गर्ने खेल) पहिलो पटक गराएको हो ।

क्लवले यो साहसिक खेल नेपालमै पहिलो पटक आफुहरुले गराएको दाबी गरेको छ । विगतमा लायन्सले ‘साइकल प्लाङक ब्यालेन्स’ गराउँदै आएको थियो ।