लुम्बिनी लर्निङ सेन्टरले मनायो ‘बृहत तीज गीत’ प्रतियोगिता

साझाकुरा,कपिलवस्तु । ब्राइट लुम्बिनी इन्टरनेशनल एजुकेसन प्रा.ली. द्वारा तीज गीत र सन्देशमुलक भिडियो प्रतियोगिताको भव्य समापन गरिएको छ।

कार्यक्रममा बाणगङ्गा नगरपालिकाकी उपप्रमुख रिता कुमारी चौधरीले नेपाली संस्कृतिको संरक्षण र पुस्ता हस्तान्तरणमा शिक्षा र सामूहिक प्रयासको महत्त्वलाई जोड दिइन्। उनले हराउँदै गइरहेको परम्परा र संस्कृति जगेर्ना गर्न यस्ता कार्यक्रमहरूको आवश्यकताबारेमा चर्चा गरिन्।

प्रतियोगितामा हिमचुली समुहले पहिलो स्थान हासिल गर्दै ५ हजार नगद र प्रमाणपत्र प्राप्त गर्यो, जबकि गौरिशङ्कर समुहले दोस्रो स्थानमा ३५ सय नगद र प्रमाणपत्र जित्यो। सन्देशमुलक भिडियो प्रतियोगितामा पुजा घिमिरेले पहिलो स्थान प्राप्त गर्दै १० हजार नगद र प्रमाणपत्र जित्न सफल भइन्।

कार्यक्रमको समापनमा राष्ट्रिय र स्थानीय कलाकारहरूको प्रस्तुति पनि राखिएको थियो । मङ्गलबार ठाकुरापुरको पिस हिमालयन रिसोर्टमा भएको कार्यक्रममा लुम्बिनी लर्निङ सेन्टरका संचालक असिम कडेल क्षेत्रीको अध्यक्षता तथा सञ्चारकर्मी हरि आचार्यको संचालनमा सम्पन्न भएको हो ।