सफ्टवेयरको सोर्सकोड चोरी गरेको आरोपमा एक जना पक्राउ

 निओ एचआरआईएस नामक सफ्टवेयरको सोर्सकोड चोरी गरेको आरोपमा एक जना पक्राउ परेका छन् । पक्राउ पर्नेमा बारा महागढीमाई नगरपालिका घर भई हाल काठमाडौं त्रिपुरेश्वरस्थित पावर ब्रेन नामक कम्पनीमा कार्यरत ३१ वर्षीय उमेशकुमार गुप्ता रहेका छन् । 

साइबर ब्युरोबाट खटिएको प्रहरी टोलीले गुप्तालाई मङ्गलबार काठमाडौंबाट पक्राउ गरेको हो ।

सफ्टवेयरको सोर्स कोडमा अनधिकृत पहुँच पुऱ्याई चोरी गरी बौद्धिक सम्पत्तिमा आघात पुऱ्याउने मनसाय लिएको भन्दै ब्युरोमा उजुरी परेको थियो । उक्त विषयमा ब्युरोले गरेको प्रारम्भिक प्राविधिक अनुसन्धान तथा विश्लेषणबाट त्यस कार्यमा गुप्ता संलग्न रहेको देखिएको हो ।

आराेपी गुप्तामाथि विद्युतीय (इलेक्ट्रोनिक) कारोबार ऐन, २०६३ अपराध अन्तर्गतको कसुरमा काठमाडौं जिल्ला अदालतबाट पाँच दिनको म्याद थप गरी आवश्यक अनुसन्धान भइरहेको छ ।