तिहार पर्खिरहेका ‘सयपत्री र मखमली’ (फोटोकथा)

राजेन्द्र खनाल, कपिलवस्तु । वर्षा सकिएर भर्खरै शरदले छोएको आँगन, डिलैमा लहरै फुलिरहेका मखमली र सयपत्रीका बोट । शहर देखि गाउँ सम्म झिलिमिली बत्तीको रङ अनि यसैसँग जोडिएको सप्तरङ्गी टिकाले सजिएको तिहार । यतिबेला नेपालीहरुका घर आँगनमा साँच्चै तिहारले छपक्कै छोपेको छ ।

बजारको किनमेलका लागि दिदीबहिनीलाई चटारो परेको छ । आमाहरुलाई घरमा सेलरोटी र अनरसामा स्वाद भर्ने तरखर छ । दाजुभाइले दिदीबहिनीको बाटो कुरीरहेछन् । भर्खर बडादशैँ पठाएर धान समेत भित्राइसकेका किसान पनि तिहारलाई पर्खिरहेझै आँगनको डिलमा झुलिरहेका मखमली र सयपत्रीले पनि तिहार पर्खिरहेका छन् ।

फूलहरूको पर्व तिहार आउँन अब केही दिन मात्रै बाँकी रहँदा प्राय नेपालीहरुका घर कौसी र आँगनका डिल सयपत्री र मखमलीले सजिएका छन् । मानौ, यी फूलहरु तिहारकै लागि फुलेका हुन । टिपेर राख्दा धेरै दिन सम्म पनि नओइलीने मखमली र विभिन्न रङमा फुल्ने सयपत्रीले साँच्चै तिहार भित्राइसकेका छन् ।

केटाकेटीहरु दौँतरी समूहमा तिहारको देउसी भट्टाउने सूरमा छन । युवायुवतीहरुले पनि आफ्नै समूह बनाएर देउसीरेको तयारी थालेका छन् । उनीहरुलाई पनि आनन्दित र तिहारमय बनाउन यतिबेला फुलिरहेका छन्, मखमली र सयपत्रीहरु ।
तिहारका बेला भाइटिकाका दिन आफ्ना दिदीबहिनीले दाजुभाईलाई पहिराइदिने मालाका लागि प्रयोग हुने यी फुलहरुले तिहारलाई मात्रै भित्राएका छैनन, बरु तिहारसँगै यतिबेलाको शरदको पवनलाई पनि पुष्पवासना छरिरहेका छन् । अरुबेला फर्किने गुलाफ, लालुपाते यतिबेला सयपत्री र मखमलीका अगाडी फिक्का बनिरहेका छन् ।

 

अझ भनौ दशैँ सकिएर घरआँगनमा बोटैले धान्न नसक्नेगरी फुलेका सयपत्रीले तिहारलाई बोलाइरहेका छन् । तिहारलाई पर्खिरहेका छन् । तिहारमा घर सजाउन होस् वा काग, कुकुर, गाई र आफ्ना दाजुभाईलाई पूजा गर्न होस्, सबैका लागि प्रीय मानिने सयपत्रीले यतिबेला घरको सुन्दरता बढाएका छन् अनि गाउँमा रौनकता थपिदिएका छन् ।

‘यस वर्ष ढिलो तिहार भएकोले पनि बगैँचामा फूल पूरै फक्रिसकेका छन् । नओइलाउने मखमली कतिपयका बारीबाटै बिक्री शुरू भएको छ । व्यवसायिक फूल खेतिले यसको महत्व नै बढाएको छ ।

घरघरमा तिहारको परिकारका लागि बनाइने सेलरोटी र अनरसाको बासना, त्यसैमाथि घरआँगनका डिलमा फुलिरहेका सयपत्रीको मनोरमताले गाउँ नै सुगन्धित र सुन्दर बनेका छन् । सन्ध्यामा बालिने दियो, झिरझिरे बत्ती र रङ्गिचङ्गी बिजुली बत्तीको उज्यालो अनि घरको मूलद्धार अघि पट्टी बनाइने रङ्गौलीको सादृश्यतासँगै तिहारलाई पर्खिरहेका छन् ः सयपत्री र मखमली । (फोटोकथा)