आजकै दिन : नाइटिंगलको मृत्यु

काठमाडौँ

सन् १९१० मा आजकै दिन (अगस्ट १३) मा फ्लोरेन्स नाइटिंगलको मृत्यु भएको थियो । नर्सिङ व्यवस्थालाई सुधार्न आफ्नो जीवन समर्पण गरेकी फ्लोरेन्सलाई आधुनिक नर्सिङकी जन्मदाता मानिन्छ ।

उनको जन्म १८२० मे १२ मा इटलीमा भएको थियो । फ्लोरेन्सका आफ्ना बुबाआमाको चाहनाविपरीत मानिसहरूको सेवाका लागि नर्स बनेकी थिइन् ।

सुरुमा आफ्नी बिरामी हजुरआमाको स्याहारसुसारमा खटिएपछि सेवामा लाग्ने उद्देश्य लिएकी उनले नर्सिङ पढाइ सुरु गरेकी थिइन् । खासगरी क्राइमिया युद्धको समयमा घाइतेहरूको सेवाका लागि फ्लोरेन्स रातदिन खटिएकी थिइन् । युद्धका बेला उनी घाइते सैनिकहरूको सेवाका लागि भनेर ३८ जना नर्सको टोलीसहित टर्की गएकी थिइन् ।

त्यतिबेला उनले मैनबत्ती बालेर भए पनि घाइते सैनिकको सेवा गर्थिन् । जसका कारण ब्रिटिस सरकारले उनलाई ‘लेडी विथ द ल्याम्प’ उपाधिबाट सम्मान गरेको थियो । त्यसका साथै उनी ‘रोयल रेडक्रस’ बाट पनि सम्मानित भएकी थिइन् ।