आज २१ जुन अर्थात विश्व संगीत दिवस

काठमाडौं । आज २१ जुन अर्थात विश्व संगीत दिवस । हरेक वर्ष आजको दिन विश्व संगीत दिवस मनाउने गरिन्छ । आजको दिन विशेष सांगीतिक कार्यक्रम आयोजना गर्दै संगीत दिवस मनाउने गरिन्छ ।

फ्रान्सको पेरिसबाट ‘फेट डे ला म्युजिक’ नामले प्रारम्भ भएको यो महोत्सवलाई हाल विश्वका हरेक कुनामा विश्व संगीत दिवसको रूपमा मनाउने गरिएको छ । सन् १९८२ को जुन २१ तारिखका दिन पहिलो पटक विश्व संगीत दिवस मनाइएको थियो । त्यसयता हरेक वर्ष जुन २१ मा यो दिवस मनाइँदै आइएको छ । संगीतसँग सम्बन्धित सबैलाई एकै ठाउँमा ल्याउने उद्देश्यले विश्वका विभिन्न ११० भन्दा बढी देशमा संगीत दिवस मनाउने गरिन्छ ।

नेपालमा विसं २०४५ सालदेखि संगीत दिवस मनाउन थालिएको हो । संगीत तथा कला क्षेत्रमा क्रियाशील साधक एवं गायक–गायिका, रचनाकार, संगीतकार तथा संगीतप्रेमीहरूको सहभागितामा यो दिवस मनाउने गरिन्छ । संगीतलाई विश्वव्यापी भाषा मानिन्छ । २१ जुन दिन वर्षको सबैभन्दा लामो दिन पनि हो । आजकै दिन विश्व योग दिवस पनि मनाईंदैछ ।

466